కాంగ్రెస్ అంతర్గత విభేదాలు: హైకమాండ్ సీరియస్‌, యువజన కాంగ్రెస్ అధ్యక్షుడి భేటీ

కాంగ్రెస్ అంతర్గత విభేదాలు పెరుగుతున్న నేపథ్యంలో యూత్ కాంగ్రెస్ అధ్యక్షుడు జక్కిడి శివచరణ్ రెడ్డి, జక్కిడి ప్రభాకర్ రెడ్డి ఏఐసీసీ రాష్ట్ర ఇంచార్జి మీనాక్షి నటరాజన్‌తో భేటీ అయ్యారు.

గత రెండు రోజులుగా పార్టీ వర్గాల మధ్య విభేదాలు తీవ్రమయ్యాయి. వీటిపై హైకమాండ్ సీరియస్‌గా స్పందించింది. పీసీసీ అధ్యక్షుడు మహేశ్ కుమార్ గౌడ్తో పాటు మీనాక్షి నటరాజన్ కూడా అసంతృప్తి వ్యక్తం చేశారు.

శివచరణ్ రెడ్డిపై చర్యలు తీసుకోవాలని బీసీ సంఘాలు హైకమాండ్‌కు ఫిర్యాదు చేశాయి. ఈ ఫిర్యాదుల నేపథ్యంలోనే పరిశీలకుడిగా చల్లా నరసింహారెడ్డిని నియమించారు. ఆయనకు రంగారెడ్డి జిల్లా డీసీసీ అధ్యక్ష బాధ్యతలు కూడా అప్పగించారు.

ఇవాళ ఉదయం శివచరణ్ రెడ్డి రాజ్యసభ సభ్యుడు వేం నరేందర్ రెడ్డితో కూడా భేటీ అయ్యారు. ఎల్బీ నగర్ కాంగ్రెస్ నియోజకవర్గ ఇంచార్జి సహా పలువురు నేతలు పీసీసీ చీఫ్‌ను కలిసి ఫిర్యాదు చేశారు.

శివచరణ్ రెడ్డి తండ్రి చేసిన వ్యాఖ్యల ఆడియో క్లిప్‌లు సోషల్ మీడియాలో వైరల్ అవుతున్నాయి. పార్టీ నేతలు, నాయకత్వంపై చేసిన ఆరోపణలతో కాంగ్రెస్ హైకమాండ్ మరింత ఆగ్రహం వ్యక్తం చేసింది. ఈ అంశంపై దర్యాప్తు చేసి నివేదిక ఇవ్వాలని రంగారెడ్డి జిల్లా అధ్యక్షుడికి పీసీసీ ఆదేశాలు జారీ చేసింది. త్వరగా చర్యలు తీసుకోవాలని పార్టీ వర్గాలు ఒత్తిడి చేస్తున్నాయి.