ఆదిలాబాద్: ఇండస్ట్రియల్ కారిడార్ భూసేకరణను వ్యతిరేకిస్తూ రైతుల ఆందోళన

ఆదిలాబాద్ జిల్లాలో ప్రతిపాదిత ఇండస్ట్రియల్ కారిడార్ కోసం భూసేకరణను వ్యతిరేకిస్తూ పలు గ్రామాల రైతులు నిరసన తెలిపారు. రాంపూర్, గూడా, గిమ్మ, కొరాట, హత్తిఘాట్, బోరజ్ తదితర గ్రామాలకు చెందిన అన్నదాతలు జిల్లా కలెక్టర్ను కలిసి వినతిపత్రం అందజేశారు.

చనాక-కొరాట ప్రాజెక్ట్ పరిధిలో 10,000 ఎకరాల భూసేకరణకు ప్రభుత్వం నోటిఫికేషన్ జారీ చేసింది. ఇప్పటికే సోషియో ఎకనామిక్ సర్వేలు కూడా చేపట్టింది. అయితే, నష్టపరిహారంపై స్పష్టత లేకుండానే భూసేకరణకు పాల్పడుతున్నారని రైతులు ఆరోపిస్తున్నారు.

ఎకరానికి రూ.40 నుంచి రూ.60 లక్షల నష్టపరిహారం, ప్రతి ఇంటికి ఒక ప్రభుత్వ ఉద్యోగం, డబుల్ బెడ్రూమ్ ఇళ్లు, రోజువారీ ఉపాధి కల్పించాలని రైతులు డిమాండ్ చేశారు. పరిహారంపై ప్రభుత్వం స్పష్టమైన హామీ ఇచ్చిన తర్వాతే భూములు ఇవ్వాలని వారు పేర్కొన్నారు. కొంతమంది రైతులు మాత్రం తమ భూములను ఎట్టి పరిస్థితుల్లోనూ ఇవ్వబోమని ఖండితంగా చెప్పారు.

గతంలో చనాక-కొరాట బ్యారేజీ నిర్మాణానికి భూములు ఇచ్చామని, ఆ నీటి వల్ల రెండు పంటలు పండించవచ్చని భావించామని రైతులు తెలిపారు. కానీ ఇప్పుడు అదే ప్రాంతంలో ఇండస్ట్రియల్ కారిడార్ రావడం వల్ల తాము నష్టపోతున్నామని ఆవేదన వ్యక్తం చేశారు. భూసేకరణ విషయంలో ఇప్పటికీ ప్రభుత్వం నుంచి ధర నిర్ణయం కాలేదని, ధర ప్రకటించాకే పత్రాలు తీసుకోవాలని రైతులు కోరుతున్నారు.

తమ డిమాండ్లు నెరవేరకపోతే ధర్నా, రోడ్డు ఎక్కడం వంటి ఆందోళనలకు సిద్ధంగా ఉన్నామని రైతులు హెచ్చరించారు. జిల్లా కలెక్టర్ ఈ విషయాన్ని తెలంగాణ ప్రభుత్వం దృష్టికి తీసుకెళ్తారని వారు ఆశాభావం వ్యక్తం చేశారు.