టీటీడీ బోర్డు సమావేశంలో కొత్త విరాళాల పాలసీ ఆమోదం, టాటాకు మ్యూజియం బాధ్యతలు

తిరుమల తిరుపతి దేవస్థానం (టీటీడీ) ధర్మకర్తల మండలి సమావేశం శుక్రవారం 11 గంటలకు ప్రారంభమై సుదీర్ఘంగా జరిగింది. ఈ సమావేశంలో 72 అంశాలపై చర్చించి పలు కీలక నిర్ణయాలు తీసుకున్నారు.

కొత్త విరాళాల పాలసీ: భక్తుల దర్శన సమయాన్ని పెంచే ఉద్దేశంతో విరాళదారుల ప్రత్యేకతలను తగ్గిస్తూ కొత్త పాలసీని రూపొందించారు. ఈ రాత్రి 12 గంటల నుంచి అమల్లోకి వస్తుంది. గతంలో విరాళాలు ఇచ్చినవారికి ఎలాంటి మార్పులు ఉండవని, రేపటి నుంచి వచ్చే కొత్త విరాళాలకు మాత్రమే ఇది వర్తిస్తుందని టీటీడీ చైర్మన్ బీ.ఆర్. నాయుడు తెలిపారు. 10 లక్షల రూపాయల విరాళం ఇచ్చేవారికి ఏడాదికి మూడు సార్లు దర్శనం ఇచ్చే అవకాశం కొనసాగుతుంది.

ఎస్వీ మ్యూజియం నిర్వహణ బాధ్యతలను టాటా సంస్థకు అప్పగించాలని నిర్ణయించారు; టాటా అంగీకారం లభిస్తే అప్పగింపు జరుగుతుంది. ఒంటిమెట్ట కోదండరామస్వామి ఆలయంలో స్వామివారి బంగారు కవచాల తయారీకి 1000 గ్రాముల బంగారాన్ని వినియోగించుకోవడానికి ఆమోదం లభించింది. కుంటిమిట్ల కోదండరామ స్వామి ఆలయం వద్ద 100 పడకల విశ్రాంతి గృహ సముదాయ నిర్మాణానికి 17.84 కోట్లు మంజూరైంది.

మౌలిక సదుపాయాలు: ఎస్ఎస్సీ టోకెన్లు ఉన్న భక్తుల కోసం అల్వార్ ట్యాంక్ సమీపంలో శాశ్వత షెల్టర్లు, ఫ్యూ లైన్లు, టాయిలెట్ల నిర్మాణానికి 6.31 కోట్ల టెండర్లకు ఆమోదం. కుమారధార, పసుపుధార డ్యాముల డబుల్ లేన్ వంతెన నిర్మాణానికి 2.77 కోట్లు. తిరుమలలో గ్రీన్ ఎనర్జీ కోసం 800 కిలోవాట్ల విండ్ టర్బైన్ ఏర్పాటుకు ఒక సంస్థ ద్వారా 25 ఏళ్ల నిరంతర విద్యుత్ సరఫరాకు ఒప్పందం.

భద్రత, వ్యర్థాల నిర్వహణ: టీటీడీ ఆలయాలు, విశ్రాంతి గృహాల్లో ఫైర్ సేఫ్టీ పరికరాల నిర్వహణకు 2.35 కోట్లు. కాకులమానుతిప్ప వద్ద 25 ఏళ్లుగా పేరుకుపోయిన ఘన వ్యర్థాలను బయో మైనింగ్ ద్వారా శుద్ధి చేసేందుకు 5 కోట్లు. టీబీసీ, ఏటీసీ విశ్రాంతి గృహాల వద్ద 12 పాత భవనాల స్థానంలో కొత్త భవనాలు నిర్మించేందుకు నిర్ణయం.

ఇతర నిర్ణయాలు: రాష్ట్రంలోని ప్రముఖ ఆలయాల్లో నిత్య వేదపారాయణ కోసం 791 మంది వేద పండితుల నియామకానికి ఆమోదం. 2027 సంవత్సరానికి డైరీలు, క్యాలెండర్ల ముద్రణకు అనుమతి. టీటీడీ క్యాంటీన్‌లో 65 సర్వర్ పోస్టులను క్యాటరింగ్ సూపర్వైజర్‌లుగా మార్చే ప్రతిపాదన. తాతయ్యగుంట గంగమ్మ ఆలయంలో ముఖమండపం, ప్రాకార గోడ నిర్మాణానికి 2.5 కోట్లు.

కర్ణాటక సీఎం వ్యాఖ్యలు: హారతి ప్రివిలేజ్ విషయంలో కర్ణాటక ముఖ్యమంత్రి చేసిన వ్యాఖ్యలపై టీటీడీ బోర్డు చర్చించింది. ఆయనకు సరైన అవగాహన లేదని, పాలసీ వివరాలతో రిజాయిండర్ పంపనున్నట్లు చైర్మన్ తెలిపారు.