ప్రపంచ శాంతి, అభివృద్ధికి భారత్ కట్టుబడి ఉందని ఐరాసలో జైశంకర్ ప్రకటించారు

విదేశాంగ మంత్రి జైశంకర్ న్యూయార్క్‌లోని ఐక్యరాజ్య సమితి ప్రధాన కార్యాలయంలో ప్రసంగించారు. అంతర్జాతీయ వేదికలపై దక్షిణార్థగోళ దేశాల గొంతును బలంగా వినిపించేందుకు భారత్ కృషి చేస్తుందని ఆయన అన్నారు.

2028-29 సంవత్సరానికి ఐరాస భద్రతా మండలి తాత్కాలిక సభ్యదేశ హోదా కోసం భారత్ పోటీపడుతున్న నేపథ్యంలో జైశంకర్ ఈ ప్రసంగం చేశారు. భద్రతా మండలిలో భారత్‌కు అవకాశం లభిస్తే విస్తృత సంప్రదింపుల ద్వారా నిర్ణయాలు తీసుకునే విధానం మరింత బలోపేతం అవుతుందని ఆయన విశ్వాసం వ్యక్తం చేశారు.

భారత్ శాంతి సూత్రాన్ని ఆధారంగా చేసుకుని పనిచేస్తుందని చెప్పారు. చర్చలు, దౌత్యం ద్వారా సమస్యలు పరిష్కరించుకోవడానికి భారత్ మద్దతు ఇస్తుందని పునరుద్ఘాటించారు. ఉగ్రవాద ఆర్థిక మూలాలను నాశనం చేస్తే ప్రపంచ ఉగ్రవాద సమస్య ఉండదని, ఆ దిశగా భారత్ ఇప్పటికే చర్యలు తీసుకుందని జైశంకర్ తెలిపారు.

ప్రపంచ శాంతి పరిరక్షణలో భారత్ దశాబ్దాల కృషిని ప్రత్యేకంగా ప్రస్తావిస్తూ, 50 శాంతి పరిరక్షణ మిషన్‌ల్లో దాదాపు 3 లక్షల మంది సిబ్బందిని భారత్ మొహరించిందని వివరించారు. ప్రస్తుతం 79 దేశాల్లో భారత్ నిధులతో అభివృద్ధి ప్రాజెక్టులు అమలవుతున్నాయని కూడా ఆయన పేర్కొన్నారు.