నాసిక్: వేధింపును ఎదిరించిన కుటుంబంపై 25 కి.మీ. వెంటాడి దాడి, 9 మంది అరెస్ట్

మహారాష్ట్రలోని నాసిక్ జిల్లాలో ఓ కుటుంబం వేధింపులను ఎదిరించినందుకు కొందరు దుండగులు 25 నుంచి 30 కిలోమీటర్ల మేర కారును వెంటాడి దాడి చేసిన ఘటన వెలుగులోకి వచ్చింది. ఈ సంఘటన జూలై 12న బావ్లీ డ్యామ్ సమీపంలో చోటు చేసుకుంది. కుటుంబానికి చెందిన మహిళ ఇద్దరు యువకుల వేధింపులను ప్రతిఘటించడంతో చెలరేగిన వివాదం భీకర దాడిగా మారింది. బాధిత కుటుంబం టాటా సఫారీ కారులో నాసిక్ వైపు వెళ్తుండగా, నిందితులు బాలేనో కారు, ద్విచక్రవాహనాలతో పలుమార్లు అడ్డగించి బేస్‌బాల్ స్టిక్కులు, రాడ్లు, రాళ్లతో కారు అద్దాలు ధ్వంసం చేశారు. కారు ఆపేందుకు ప్రయత్నించి సాధ్యం కాకపోవడంతో కుటుంబం టోల్ ప్లాజా వద్ద బారికేడ్లు ధ్వంసం చేస్తూ ప్రాణాలు అరచేతిలో పెట్టుకుని నాసిక్‌లోని అంబడ్ పోలీస్ స్టేషన్ చేరుకుంది. కుటుంబ సభ్యులు తీసిన వీడియో ఆధారంగా పోలీసులు కేసు నమోదు చేసి, దాడిలో ప్రత్యక్షంగా పాల్గొన్న, ఆశ్రయం ఇచ్చిన వారితో సహా మొత్తం 9 మందిని అరెస్ట్ చేశారు. బాధితురాలు సిద్ధి మాట్లాడుతూ, 'మమ్మల్ని చంపే ఉద్దేశంతోనే ఇంత దారుణంగా దాడి చేశారు. అదృష్టవశాత్తు మేం తప్పించుకున్నాం' అని ఆవేదన వ్యక్తం చేశారు. నాసిక్ రూరల్ ఎస్పీ ఈ ఘటనలో కఠిన చర్యలు తీసుకుంటామని, మరికొందరు నిందితుల కోసం గాలింపు కొనసాగుతోందని తెలిపారు. ఈ సంఘటనపై ఇగత్‌పురి, అంబడ్ పోలీసులు సమన్వయంతో దర్యాప్తు చేస్తున్నారు.