తెలంగాణ SIR ప్రక్రియ నెమ్మదిగా, ఓటర్ల ఫిర్యాదులు; జూలై 24 గడువు

తెలంగాణలో ప్రత్యేక సమగ్ర సవరణ (SIR) ప్రక్రియ జూన్ 24 నుంచి ప్రారంభమైంది. మరో 10 రోజుల్లో జూలై 24తో ఈ ప్రక్రియ గడువు ముగియనుంది.

రాష్ట్ర ఎన్నికల ప్రధాన అధికారి (CEO) సుదర్శన్ రెడ్డి మాట్లాడుతూ, 99.98% ఇళ్లకు ఎన్యుమరేషన్ ఫారాల పంపిణీ పూర్తయిందని తెలిపారు. రోజుకు 20 లక్షలకు పైగా ఫారాలను డిజిటలైజ్ చేస్తున్నామన్నారు.

కానీ క్షేత్రస్థాయిలో ఓటర్ల ఫిర్యాదులు అందుతున్నాయి. ఇప్పటికీ బీఎల్ఓలు తమ ఇంటికి రాలేదని, ఫారాలు ఇవ్వలేదని పలువురు ఫిర్యాదు చేస్తున్నారు. మున్సిపల్ కార్యాలయాలు, గ్రామ పంచాయతీలు, ఈఆర్ఓ కార్యాలయాల్లో ఓటర్లు అసంతృప్తి వ్యక్తం చేస్తున్నారు.

2002 నాటి ఓటర్ల జాబితాలో తల్లిదండ్రుల పేర్లు, ఇంటిపేర్లు తప్పుగా ఉన్నట్లు గుర్తించారు. దీంతో దాదాపు 30 లక్షలకు పైగా ఎనామిలీస్ (తప్పులు) నమోదై, ఫిర్యాదులు వచ్చాయి.

ఒకే వ్యక్తి రెండు ప్రాంతాల్లో ఓటు హక్కు కలిగి ఉంటే జైలు శిక్ష, కఠిన చర్యలు తీసుకుంటామని ఎన్నికల అధికారులు హెచ్చరించారు. గ్రామీణ, పట్టణ ప్రాంతాల్లో రెండు వేర్వేరు ఓట్లు ఉన్నా చర్యలు తప్పవని స్పష్టం చేశారు.

మరో 10 రోజుల గడువు ఉన్నందున, ఇప్పటికీ ఫారాలు తీసుకోని వారు వెంటనే బీఎల్ఓలను సంప్రదించి ఫారాలు తీసుకోవాలని అధికారులు సూచించారు.