మూసీ రివర్ ఫ్రంట్ పనులు ప్రారంభం: నైట్ ఎకానమీ లక్ష్యమని CM రేవంత్ రెడ్డి ప్రకటన

హైదరాబాద్ పాత నగరంలో మూసీ రివర్ ఫ్రంట్ అభివృద్ధి పనులు ప్రారంభమయ్యాయని ముఖ్యమంత్రి రేవంత్ రెడ్డి ప్రకటించారు. ఈ ప్రాజెక్టులో భాగంగా నది తీరాన్ని అందంగా తీర్చిదిద్దనున్నారు.

నిజాం పాలనలో మూసీ నది తీరం చాలా అందంగా ఉండేదని ఆయన అన్నారు. సాలార్ జంగ్ మ్యూజియం, సిటీ కాలేజీ, సిటీ లైబ్రరీ, ఉస్మానియా ఆస్పత్రి, బ్రిటిష్ రెసిడెన్సీ, మహిళా యూనివర్సిటీ ప్రాంతాల్లో నది తీరాన్ని అభివృద్ధి చేశారని చెప్పారు. తర్వాత ఆ ప్రాంతం ఆక్రమణలకు గురైందని, చెత్త కుప్పగా మారిందని తెలిపారు. నది వైపు చూసేందుకు కూడా ప్రజలు భయపడే పరిస్థితి ఏర్పడిందని అన్నారు.

పాత నగర మూసీ తీరాన్ని ఇతర రాష్ట్రాలు, దేశాల నుంచి వచ్చేవారు చూసే స్థాయిలో అభివృద్ధి చేస్తామని CM చెప్పారు. ఈ ప్రాజెక్టు వల్ల స్థానిక యువతకు ఉద్యోగ అవకాశాలు పెరుగుతాయని ఆయన అన్నారు.

మూసీ రివర్ ఫ్రంట్ వెంబడి నైట్ ఎకానమీ అభివృద్ధి చేయాలని ప్రభుత్వం లక్ష్యంగా పెట్టుకుంది. చార్మినార్ చుట్టుపక్కల రాత్రి 11 గంటల తర్వాత కూడా వ్యాపారం కొనసాగుతుందని ఆయన గుర్తు చేశారు. అదే తరహాలో పూర్తి రివర్ ఫ్రంట్‌లో రాత్రి పూట వ్యాపారం నడపాలని చెప్పారు. విద్యార్థులు పగలు చదువుకుని, రాత్రి పని చేసి ఆదాయం సంపాదించవచ్చని అన్నారు.

రాత్రి పూట జరిగే వ్యాపారం వల్ల రాష్ట్ర, దేశ ఆర్థిక వ్యవస్థకు ప్రయోజనం ఉంటుందని CM రేవంత్ రెడ్డి అన్నారు. ప్రాజెక్టుకు ఎవరైనా అడ్డుపడితే ఎదుర్కొంటామని ఆయన స్పష్టం చేశారు.