నల్గొండ నాగార్జున సాగర్ కాలువలో రసాయనాలు పారబోత; పోలీసుల విచారణ

నల్గొండ జిల్లా పెద్దవూర మండలం చింతపల్లి సమీపంలో నాగార్జున సాగర్ లెవల్ కాలువలో గుర్తు తెలియని వ్యక్తులు ప్రమాదకర రసాయనాలు పారబోశారు.

కాలువలో రసాయనాలు ఉన్నట్లు గుర్తించిన స్థానికులు వెంటనే పోలీసులకు ఫిర్యాదు చేశారు. దీంతో పోలీసులు ఘటనపై విచారణ ప్రారంభించారు.

కాలువ పరిసర ప్రాంతాల్లోని సీసీటీవీ కెమెరాల ఫుటేజీని పోలీసులు పరిశీలిస్తున్నారు. రసాయనాలు పారబోసిన వారిని గుర్తించేందుకు గాలింపు చేపట్టారు.

త్రాగు, సాగు నీటికి ఉపయోగించే ఈ కాలువలో రసాయనాలు కలవడంపై స్థానికులు ఆందోళన వ్యక్తం చేస్తున్నారు. జలచరాలు, ఇతర జీవరాశులకు, పర్యావరణానికి ముప్పు ఉంటుందని వారు చెప్తున్నారు. ఘటనకు పాల్పడిన వారిపై కఠిన చర్యలు తీసుకోవాలని డిమాండ్ చేస్తున్నారు.

రసాయనాలు పారబోసిన వారి కోసం పోలీసుల గాలింపు కొనసాగుతోంది.