గుజరాత్‌లో కంకావతి నదిలో చిక్కుకున్న 12 మందిలో ఐదుగురిని రక్షించిన NDRF

గుజరాత్ రాష్ట్రంలోని మోర్బి జిల్లాలో కంకావతి నది వరద ప్రవాహం పెరగడంతో చిక్కుకున్న 12 మందిలో ఐదుగురిని జాతీయ విపత్తు స్పందన దళం (NDRF) విజయవంతంగా రక్షించింది. హల్వద్ తహసీల్‌లోని ఆ ప్రాంతంలో మధ్యాహ్నం నుంచి 12 మంది నీటిలో చిక్కుకుపోయారు. ముందుగా SDRF, ఫైర్ సిబ్బంది ప్రయత్నించినా నీటి ఉధృతి ఎక్కువగా ఉండటంతో వారు ప్రభావితులను చేరుకోలేకపోయారు. అనంతరం కచ్ జిల్లాలో అప్పటికే మోహరించి ఉన్న NDRF బృందాన్ని సాయం కోసం పిలిపించారు. NDRF డిప్యూటీ కమాండెంట్ తెలిపిన వివరాల ప్రకారం, సాయంత్రం 7:50 గంటలకు ఈ ఘటనపై సమాచారం అందగానే తమ బృందం బయలుదేరింది. కానీ ఆ ప్రాంతం చాలా కఠినంగా, నీటితో నిండి ఉండటంతో ప్రయాణం ఆలస్యమైంది. స్థానిక అధికారులు ట్రాక్టర్లు సమకూర్చగా, NDRF సిబ్బంది తమ ప్రత్యేక ఉపకరణాల సాయంతో నదిలోకి దిగి రెస్క్యూ ఆపరేషన్ చేశారు. ఉదృతి కాస్త తగ్గిన సమయంలో ఐదుగురిని సురక్షితంగా బయటకు తీసుకొచ్చారు. మిగిలిన ఏడుగురు వద్దకు వారి కుటుంబ సభ్యులు చేరుకోవడంతో వారికి ప్రమాదం తప్పింది. NDRF బృందం జూన్ 21 నుంచే కచ్ జిల్లాలో ముందస్తుగా మోహరించి ఉండటం ఈ రెస్క్యూ ఆపరేషన్‌కు ఉపయోగపడింది. ఘటనా స్థలం చేరుకోవడానికి దాదాపు రెండు గంటలు పట్టిందని, ఆపై వేగంగా స్పందించి ప్రాణాలు కాపాడినట్లు అధికారులు తెలిపారు.