NEET UG 2026 రీఎగ్జామ్‌కు సర్వం సిద్ధం: సుప్రీంకోర్టు పరీక్ష నిలిపివేతకు నిరాకరణ

NEET UG 2026 రీఎగ్జామ్‌కు సర్వం సిద్ధమైంది. పరీక్షను నిలిపివేయాలని కోరుతూ పలువురు అభ్యర్థులు సుప్రీంకోర్టును ఆశ్రయించారు. అయితే శుక్రవారం విచారణ జరిపిన న్యాయస్థానం ఆ విజ్ఞప్తిని తోసిపుచ్చింది. ప్రధాన న్యాయమూర్తి జస్టిస్ సూర్యకాంత్ నేతృత్వంలోని ధర్మాసనం పిటిషన్లను అత్యవసరంగా విచారించాలని అభ్యర్థుల న్యాయవాదులు కోరగా, అందుకు నిరాకరించింది. NEET కు సంబంధించిన అన్ని పిటిషన్లు జస్టిస్ PS నరసింహ ధర్మాసనం ముందు విచారణకు వెళతాయని తెలిపింది. అభ్యర్థులు లేవనెత్తిన విషయాల్లో అత్యవసర స్థితి లేదని CJI స్పష్టం చేశారు.

ఈ నేపథ్యంలో ఆదివారం పరీక్ష యథాతథంగా కొనసాగనుంది. పరీక్షకు ముందే కేంద్రం బిగ్ ఆపరేషన్ పేరిట భద్రతా చర్యలు చేపట్టింది. సుమారు రెండు లక్షల మంది సిబ్బందితో మాక్ డ్రిల్ నిర్వహించనుంది. National Testing Agency విద్యార్థుల కోసం అధికారిక WhatsApp నంబర్‌ను ప్రారంభించింది. అలాగే పరీక్షకు సంబంధించి వస్తున్న తప్పుడు SMS లు, ఈమెయిళ్ళను నమ్మొద్దని హెచ్చరించింది.

మరోవైపు NEET UG 2026 రీటెస్ట్ ప్రశ్నపత్రం Instagram లో లీక్ అయిందంటూ ఒక వ్యక్తి సోషల్ మీడియాలో పోస్ట్ పెట్టాడు. అందులో పేపర్ B అని రాసి ఉన్న బుక్లెట్‌ను ఒక వ్యక్తి తెరుస్తున్న దృశ్యాలు కనిపించాయి. దీంతో పలువురు విద్యార్థులు, తల్లిదండ్రులు ఆందోళన వ్యక్తం చేశారు. అయితే కేంద్ర ప్రభుత్వం ఆ వీడియో నకలీదిగా తేల్చింది. National Testing Agency ఈ విషయాన్ని స్పష్టం చేస్తూ, తప్పుడు సమాచారాన్ని నమ్మొద్దని సూచించింది.