నీట్ యూజీ రీ-ఎగ్జామ్‌పై దేశవ్యాప్తంగా మాక్ డ్రిల్

నీట్ యూజీ రీ-ఎగ్జామ్ కోసం జాతీయ టెస్టింగ్ ఏజెన్సీ (ఎన్టీఏ) ఈరోజు దేశవ్యాప్తంగా మాక్ డ్రిల్ నిర్వహిస్తోంది. ఉదయం 9 గంటలకు ప్రారంభమైన ఈ డ్రిల్ రాత్రి 8 గంటల వరకు కొనసాగుతుంది.

గత నెలలో జరిగిన నీట్ పరీక్ష పేపర్ లీక్ అయిన కారణంగా ఆ పరీక్షను రద్దు చేశారు. దీంతో రీ-ఎగ్జామ్‌ను ఎన్టీఏ సవాలుగా తీసుకుని నిర్వహిస్తోంది. ప్రశ్నపత్రాల పంపిణీ నుంచి జవాబు పత్రాల సేకరణ వరకు ప్రతి దశను ఈ మాక్ డ్రిల్‌లో పరిశీలిస్తున్నారు.

ఈ రీ-ఎగ్జామ్‌కు 22 లక్షల మంది విద్యార్థులు రిజిస్టర్ చేసుకోగా, 19 లక్షల మంది ఇప్పటికే హాల్ టికెట్లు డౌన్లోడ్ చేసుకున్నారు. దేశవ్యాప్తంగా 5000కు పైగా పరీక్షా కేంద్రాల్లో రేపు పరీక్ష జరగనుంది.

పరీక్షా కేంద్రాలను ఎన్టీఏ తన ఆధీనంలోకి తీసుకుంది. అన్ని కేంద్రాల వద్ద మూడంచుల భద్రతా వ్యవస్థ అమలు చేస్తున్నారు. సీసీటీవీ కెమెరాలతో పాటు లక్షల మంది భద్రతా సిబ్బంది నిఘా ఉంచుతున్నారు. మల్టీ లెవెల్ సెక్యూరిటీ వింగ్ ఏర్పాటు చేసిన ఎన్టీఏ, ఈ మాక్ డ్రిల్ ద్వారా భద్రతా సంస్థల పనితీరు, సమన్వయాన్ని అంచనా వేస్తోంది. రేపు జరిగే పరీక్షలో ఎలాంటి అవాంఛనీయ సంఘటనలు జరగకుండా ముందుజాగ్రత్తగా ఈ చర్యలు తీసుకుంటున్నారు.