కొత్త సెన్సార్ నిబంధనలతో సినిమా రిలీజ్ ప్లానింగ్, OTT ఒప్పందాలపై ప్రభావం

కొత్త సెన్సార్ నిబంధనలు సినిమాల విడుదల ప్రణాళికలు, OTT ఒప్పందాలపై ప్రభావం చూపనున్నాయి. ఒకసారి సినిమా సెన్సార్ అయిన తర్వాత ఏ మార్పు చేయాలన్నా మళ్లీ మొదటి నుంచి రీసెన్సార్ చేయాల్సి ఉంటుంది.

ఇప్పటివరకు పెద్ద సినిమాల్లో సెన్సార్ తర్వాత కూడా రన్ టైమ్ సరిచేసుకోవడానికి కొన్ని సీన్లు కట్ చేయడం, కొత్త పాటల సీన్లు జోడించడం జరుగుతూ ఉండేది. కొత్త నిబంధనల ప్రకారం ఇలాంటి మార్పులకు మళ్లీ పూర్తి రీసెన్సార్ అవసరం. దీంతో విడుదల తర్వాత మార్పులు చేయడం సాధ్యపడదు.

అతిపెద్ద సమస్య OTT ఒప్పందాల్లో ఉంది. పెద్ద సినిమాలకు షూటింగ్ దశలోనే OTT డీల్స్ క్లోజ్ అవుతున్నాయి. థియేటర్ విడుదల తేదీ కూడా ముందే అగ్రిమెంట్ చేసుకుంటున్నారు. కానీ కొత్త రూల్స్ ప్రకారం ఫస్ట్ కాపీతో సెన్సార్‌కు వెళ్లి సర్టిఫికెట్ వచ్చే వరకు వేచి ఉండాలి. ఆ తర్వాతే రిలీజ్ డేట్ లాక్ చేయాలి. అలా చేస్తే ఇంతకు ముందు చేసుకున్న OTT అగ్రిమెంట్లు, థియేట్రికల్ స్లాట్లు తారుమారయ్యే ప్రమాదం ఉంది.

భారీ బడ్జెట్ సినిమాలకు వందల కోట్ల బిజినెస్ ముడిపడి ఉంటుంది. రిలీజ్ డేట్ ముందే లాక్ చేయకపోతే ఓవర్సీస్ డిస్ట్రిబ్యూషన్, థియేటర్ల అడ్జస్ట్‌మెంట్లపై ప్రభావం పడుతుంది. చివరి నిమిషంలో హడావిడి తగ్గించుకుని, విడుదలకు చాలా ముందే ఫైనల్ కాపీతో సెన్సార్‌కు అప్లై చేయాలని సూచనలు వస్తున్నాయి. తగిన ప్లానింగ్ ఉంటే తప్ప పెద్ద సినిమాలకు ఈ సెన్సార్ గండం దాటడం కష్టమన్న టాక్ వినిపిస్తోంది.