విజయవాడలో NIA ఆపరేషన్: ఉగ్ర నెట్వర్క్ కేసులో కీలక పరిణామం

విజయవాడ పాతబస్తీలో ఉగ్రవాద మూలాలు కలకలం రేపుతున్నాయి. NIA సోదాలు నిర్వహించి ముగ్గురిని అదుపులోకి తీసుకుంది. విజయవాడ పాతబస్తీ ప్రాంతాలు ఇరుకైన వీధులు, అధిక జనసాంద్రత కలిగి ఉండటం వల్ల వివిధ ప్రాంతాల నుంచి అనుమానిత వ్యక్తులు ఆశ్రయం పొంది రహస్య కార్యకలాపాలు సాగిస్తున్నారని నిఘా సంస్థలు గుర్తించాయి.

గత దశాబ్ద కాలంలో హైదరాబాద్ కేసుల విచారణలో విజయవాడ కనెక్టివిటీపై NIA పలుమార్లు రహస్య నిఘా పెట్టింది. 2026 మార్చిలో విజయవాడ టూటౌన్ పోలీస్ స్టేషన్ పరిధిలో పోలీసులు చేపట్టిన ఆకస్మిక తనిఖీల్లో ఉగ్రవాద కార్యకలాపాలకు పాల్పడుతున్న ముగ్గురు యువకులను అరెస్ట్ చేశారు. వారి ద్వారా మరో పన్నెండు మందిని అరెస్ట్ చేసి విచారించారు. ఆరు రాష్ట్రాల్లో ఈ నెట్వర్క్ సాగుతున్నట్లు గుర్తించారు.

కేంద్ర హోం మంత్రిత్వ శాఖ ఈ అంశాన్ని సీరియస్‌గా తీసుకొని NIA కు దర్యాప్తు బాధ్యతలు అప్పగించింది. Instagram, Telegram వంటి సామాజిక మాధ్యమాల ద్వారా యువతను ఆకర్షించి ఉగ్రవాదం వైపు మళ్ళించేందుకు ఈ నెట్వర్క్ ప్రయత్నించినట్లు గుర్తించారు.

ఈ కేసులో విజయవాడ పాతబస్తీకి చెందిన మహమ్మద్ రహమతుల్లా షరీఫ్, మహమ్మద్ డానిష్, మీర్జా సుహేల్ బేగ్‌లతో పాటు దేశవ్యాప్తంగా వివిధ రాష్ట్రాలకు చెందిన మరికొందరిని అరెస్ట్ చేశారు. విదేశాల్లో ఉంటున్న అల్ హకీం శుకూర్ అనే హ్యాండ్లర్ సూచనల ప్రకారం వీరు దేశంలో ఉగ్రవాద నెట్వర్క్‌ను ఆరు రాష్ట్రాలకు విస్తరించినట్లు అధికారులు ప్రాథమికంగా గుర్తించారు.

NIA అధికారులు నిందితులను కస్టడీలోకి తీసుకొని విచారించగా వారిచ్చిన సమాచారం ఆధారంగా విజయవాడ పాతబస్తీలోని నిందితుల ఇళ్లు, వారి బంధువుల నివాసాల్లో సోదాలు నిర్వహించారు. పలు కీలక పత్రాలు, డిజిటల్ పరికరాలను అధికారులు స్వాధీనం చేసుకొని పరిశీలిస్తున్నారు.

ఈ నెట్వర్క్‌కు ఇంకా ఎవరైనా ఆర్థిక సహాయం అందిస్తున్నారా, నగరంలో ఇతర వ్యక్తులతో సంబంధాలు ఉన్నాయా అనే కోణంలో విచారణ కొనసాగుతోంది. తమిళనాడుకు చెందిన NIA టీం విజయవాడలో మూడు బృందాలుగా ఏర్పడి సెర్చ్ ఆపరేషన్ నిర్వహించింది. నిందితుల కుటుంబ సభ్యులను ఐదు గంటల పాటు విచారించి కీలక విషయాలను స్టేట్‌మెంట్ రూపంలో రికార్డు చేశారు.