విజయవాడలో NIA దాడులు, 'అల్-మాలిక్ ఇస్లామిక్ యూత్' టెర్రర్ గ్రూప్ బయటపడింది

బుధవారం తెల్లవారుజామున విజయవాడలోని వించీపేట ప్రాంతంలో NIA అధికారులు ఏకకాలంలో దాడులు నిర్వహించారు. 'అల్-మాలిక్ ఇస్లామిక్ యూత్' అనే టెర్రర్ మాడ్యూల్‌కు సంబంధించిన కేసులో ఈ దాడులు జరిపారు.

మహమ్మద్ రహమతుల్లా షరీఫ్, ఎండి డానిష్, మీర్జా సోహైల్ బేగ్ నివాసాల్లో నాలుగు గంటల పాటు తనిఖీలు చేశారు. సోహైల్ బేగ్ తల్లిదండ్రుల మొబైల్ ఫోన్లు, బ్యాంకు ఖాతా స్టేట్‌మెంట్లను స్వాధీనం చేసుకున్నారు.

ఈ కేసు మార్చిలో విజయవాడ టూ టౌన్ పోలీసులు రహమతుల్లా ఇంట్లో సాధారణ తనిఖీలతో ప్రారంభమైంది. సోషల్ మీడియా నిఘా ద్వారా ఏపీ కౌంటర్ ఇంటెలిజెన్స్ సెల్ ఈ ముఠా కార్యకలాపాలను గుర్తించింది. కేసు తీవ్రత దృష్ట్యా మే నెలలో NIA చేతికి తీసుకుంది.

విదేశీ హ్యాండ్లర్ అల్-హకీం షుకూర్ ఆధ్వర్యంలో నిందితులు 'అల్-మాలిక్ ఇస్లామిక్ యూత్'గా ఏర్పాటు చేసుకున్నారు. టెలిగ్రామ్ ద్వారా పాకిస్తానీయులతో కలిసి రహస్య గ్రూపులు క్రియేట్ చేశారు. భారతదేశంలో ఇస్లామిక్ స్టేట్ స్థాపించడం, ప్రభుత్వాన్ని కూల్చడం వీరి లక్ష్యం.

ఇప్పటివరకు 11 మందితో పాటు ఒక మైనర్‌ను NIA అరెస్ట్ చేసింది. విజయవాడకు చెందిన రహమతుల్లా, డానిష్, సోహైల్‌తో పాటు హైదరాబాద్‌కు చెందిన సైదా బేగం, బళ్లారికి చెందిన అబ్దుల్ సలాం ఉన్నారు. మహిళా వింగ్ ఏర్పాటుకు కూడా కుట్ర జరిగింది.

దేశంలోని 10 రాష్ట్రాల్లో 20 ప్రాంతాల్లో NIA దాడులు చేసింది. భారీ సంఖ్యలో మొబైల్ ఫోన్లు, లాప్‌టాప్‌లు, డిజిటల్ పరికరాలు స్వాధీనం చేసుకుని ఫోరెన్సిక్ పరీక్షలకు పంపించారు. మిగిలిన నిందితుల కోసం NIA వేట కొనసాగిస్తోంది.