రాహుల్ వ్యాఖ్యలపై నిశికాంత్ దూబే ఘాటు కౌంటర్: ‘అమిత్ షా ఎవరికీ భయపడరు’

రాహుల్ గాంధీ కేంద్ర హోం మంత్రి అమిత్ షాపై చేసిన వ్యాఖ్యలపై బీజేపీ ఎంపీ నిశికాంత్ దూబే తీవ్ర స్థాయిలో స్పందించారు. ‘సూర్యుడి వైపు ఉమ్మేస్తే ఆ ఉమ్మి తిరిగి తనపైనే పడుతుంది’ అని ఉటంకిస్తూ, అమిత్ షా ఎవరికీ భయపడరని, దేశద్రోహ శక్తులు, ఉగ్రవాదులు, నక్సలైట్లు, దేశాన్ని విచ్ఛిన్నం చేసే కుట్రదారులే అమిత్ షాకు భయపడతారని దూబే వ్యాఖ్యానించారు. తాను అమిత్ షాకు భయపడుతున్నట్లు రాహుల్ గాంధీ ప్రకటించడం ద్వారా ఆయన ఎవరికి భయపడుతున్నారో స్పష్టమైందని ఎద్దేవా చేశారు. అమిత్ షా హోం మంత్రి పదవిలో కొనసాగడానికి రాహుల్ గాంధీ సర్టిఫికెట్ అవసరం లేదని, ప్రజల ఓటుతో ప్రధాని మోదీ ఆయనను నియమించారని దూబే పేర్కొన్నారు. బీజేపీ ప్రభుత్వం ఉన్నంత కాలం మోదీ ప్రధానిగా ఉంటారని, మోదీ ఉన్నంత కాలం అమిత్ షా హోం మంత్రిగా ఉంటారని స్పష్టం చేశారు. రాహుల్ గాంధీ పదవి గౌరవం, పార్లమెంటు మర్యాదను పట్టించుకోని ‘అభద్ర’ మనస్తత్వం ఉన్న వ్యక్తి అని, పార్లమెంటు వేదికను దుర్వినియోగం చేస్తున్నారని దూబే విమర్శించారు. రాహుల్ ఇటీవల అమిత్ షాపై చేసిన వివాదాస్పద వ్యాఖ్యల నేపథ్యంలో ఈ కౌంటర్ వచ్చింది. గతంలోనూ రాహుల్ గాంధీ అమిత్ షాను టార్గెట్ చేయడం, బీజేపీ నుంచి ఘాటు స్పందన రావడం తెలిసిందే. తాజా వ్యాఖ్యలపై పార్టీల మధ్య మాటల యుద్ధం మరింత ముదురుతుందని రాజకీయ విశ్లేషకులు భావిస్తున్నారు.