ప్రమాదాలను తగ్గించేందుకు డ్రైవర్ల శిక్షణకు ప్రాధాన్యత: నితిన్ గడ్కరీ

దేశంలో రోడ్డు ప్రమాదాలను అదుపు చేయడానికి డ్రైవర్ల నాణ్యమైన శిక్షణకు కేంద్ర ప్రభుత్వం అత్యంత ప్రాధాన్యత ఇస్తోందని కేంద్ర రోడ్డు రవాణా, హైవేల మంత్రి నితిన్ గడ్కరీ లోక్‌సభలో ప్రకటించారు. ఈ ఏడాది దేశంలోనే అత్యధిక రోడ్డు ప్రమాదాలు జరుగుతున్న నేపథ్యంలో, ప్రమాదాలకు ప్రధాన కారణాల్లో డ్రైవర్ల సరైన శిక్షణ లేకపోవడం ఒకటిగా గుర్తించినట్లు తెలిపారు.

ఆయన మాట్లాడుతూ, దేశంలో ఏటా సుమారు 1.5 లక్షల మంది రోడ్డు ప్రమాదాల్లో మరణిస్తున్నారని, ఈ ప్రమాదాలకు ఆటోమొబైల్ ఇంజినీరింగ్, రోడ్డు ఇంజినీరింగ్, చట్టాల అమలు, డ్రైవర్ ప్రవర్తన వంటి కారణాలు ఉన్నాయని వివరించారు. అయితే డ్రైవర్ ప్రవర్తన అత్యంత కీలకమైన అంశంగా పేర్కొంటూ, నైపుణ్యం లేని డ్రైవర్ల వల్లే ఎక్కువ ప్రమాదాలు జరుగుతున్నాయని స్పష్టం చేశారు.

ఈ సమస్యను పరిష్కరించేందుకు దేశవ్యాప్తంగా 300 డ్రైవింగ్ ట్రైనింగ్ స్కూళ్లను ఏర్పాటు చేయడానికి ప్రభుత్వం అనుమతి ఇచ్చినట్లు తెలిపారు. ప్రస్తుతం దేశంలో 22 లక్షల మంది డ్రైవర్ల కొరత ఉందని, శాస్త్రీయమైన శిక్షణ ద్వారా డ్రైవర్లలో రోడ్డు క్రమశిక్షణ, నియమాల పాటింపు పెంచి ప్రమాదాలు, మరణాల సంఖ్య తగ్గించవచ్చని గడ్కరీ వివరించారు. డ్రైవర్ల శిక్షణపై ఎంపీలు స్థానికంగా కూడా దృష్టి పెట్టాలని ఆయన సభ్యులను కోరారు.

దేశంలో డ్రైవింగ్ లైసెన్స్ జారీలో పారదర్శకత లేదని, నకిలీ పద్ధతుల ద్వారా లైసెన్సులు పొందుతున్నారన్న ఆరోపణలపై స్పందిస్తూ, డ్రైవర్ల శిక్షణపై ప్రభుత్వం ప్రత్యేక దృష్టి సారించిందని, రాబోయే రోజుల్లో ఈ వ్యవస్థలో గణనీయమైన మార్పులు చూడవచ్చని గడ్కరీ హామీ ఇచ్చారు.

దేశంలో భారీగా పెరిగిన వాహనాల సంఖ్య, కొత్త హైవేల నిర్మాణాలతో పాటు రోడ్డు భద్రతను మెరుగుపరచడానికి డ్రైవర్ల శిక్షణ కార్యక్రమాలను వేగవంతం చేయనున్నట్లు ఆయన సభలో స్పష్టం చేశారు.