శ్రావణమాసంలో అమ్మవారికి గాజుల మాల వేయవచ్చా? ఆధ్యాత్మిక వేత్త వివరణ

శ్రావణమాసంలో అమ్మవారికి గాజులు సమర్పించడంపై చాలామందికి సందేహాలు ఉంటాయి. ఈ సందేహాలకు ప్రముఖ ఆధ్యాత్మిక వేత్త డాక్టర్ భట్టిప్రోలు విజయలక్ష్మి సమాధానమిచ్చారు.

గాజులు సుమంగళ చిహ్నం అని, వాటిని అమ్మవారికి సమర్పించడం సంప్రదాయమని తెలిపారు. సహస్రనామార్చనలో ఒక్కో నామానికీ ఒక్కో గాజు పెట్టి పూజించవచ్చు. పూజ తర్వాత వాటిని ముత్తైదువులకు ప్రసాదంగా ఇవ్వవచ్చు.

గాజులను మాలలాగా అల్లి అలంకరించడం ఈ మధ్య మొదలైన కొత్త పద్ధతి. ఇది శాస్త్రాలలో చెప్పలేదు కానీ, భక్తితో చేస్తున్నందున అమ్మవారు స్వీకరిస్తారని ఆమె చెప్పారు. చిట్టి గాజులు మొక్కుగా సమర్పించడం ఆనవాయితీ. మనం ధరించిన గాజులను పూజకు ఉపయోగించాలంటే, వాటిని పాలతో కడిగి, శుద్ధోదకంతో శుభ్రం చేసి సమర్పించాలి. విడిగా గాజులు ఇవ్వడం వల్ల ప్రసాదంగా పంచిపెట్టడానికి వీలవుతుంది.