ఆపరేషన్‌ త్రిశూల్: 2019 నుంచి 274 మంది విదేశీ నేరస్థులను భారత్కు రప్పించిన కేంద్రం

కేంద్ర ప్రభుత్వం 'ఆపరేషన్‌ త్రిశూల్' పేరుతో పరారైన నేరస్థులను విదేశాల నుంచి తీసుకువచ్చే చర్యలను ముమ్మరం చేసింది. 2019 నుంచి 2026 వరకు 36 దేశాల నుంచి 274 మందిని భారత్కు రప్పించినట్లు కేంద్ర హోం శాఖ వెల్లడించింది.

ఈ లెక్కన ఏడాదికి సగటున 40 మంది నేరస్థులను తీసుకొచ్చారు. దీనికి ముందు 2004-2013 కాలంలో ఏటా నాలుగు అప్పగింతలు మాత్రమే జరిగేవని, ఇప్పుడు ఆ సంఖ్య 10 రెట్లు పెరిగిందని హోం శాఖ గణాంకాలు తెలిపాయి.

ఆర్థిక నేరగాళ్ల విషయంలో PMLA కింద 17,874 కోట్ల విలువైన ఆస్తులు జప్తు చేసినట్లు, 18,762 కోట్ల రూపాయలను తిరిగి స్వాధీనం చేసుకున్నట్లు కేంద్రం ప్రకటించింది.

కేంద్ర హోం మంత్రి అమిత్ షా మాట్లాడుతూ, "ఇంటిగ్రేటెడ్ ఇంటెలిజెన్స్ ఆధారిత సాంకేతికతతో నేరస్థులను గుర్తించి తీసుకువస్తున్నాం. పాత వ్యవస్థలో లొసుగులు, అసంపూర్ణ పత్రాలు, నెమ్మదైన ప్రక్రియల వల్ల అప్పగింత చాలా క్లిష్టంగా ఉండేది" అని తెలిపారు.

ఐబీ, సీబీఐ, రా, ఎన్ఐఏ, ఈడీ వంటి సంస్థల సమన్వయంతో ఈ ఆపరేషన్ సాగుతోంది. సాటిలైట్ లొకేషన్, డిజిటల్ ఫుట్‌ప్రింట్ వంటి ఆధునిక నిఘా వ్యవస్థలను ఉపయోగించి, పేర్లు, గుర్తింపులు మార్చుకొని దాక్కున్న నిందితులను గుర్తిస్తున్నామని అధికారులు వివరించారు.