పార్లమెంటులో 'జాతీయ గౌరవం' ప్రశ్నించిన ఒవైసీ.. చైనా సరిహద్దు, మణిపూర్ను గుర్తు చేసిన ఎంపీ

లోక్‌సభలో జాతీయ గౌరవానికి సంబంధించిన బిల్లును చర్చ లేకుండా కేవలం 10 నిమిషాల్లో ఆమోదించడాన్ని ఎంఐఎం ఎంపీ అసదుద్దీన్ ఒవైసీ తీవ్రంగా ప్రశ్నించారు. ప్రభుత్వం మొదటి అజెండాలో లేని బిల్లును అనుబంధ అజెండాగా తీసుకువచ్చి పాస్ చేయడాన్ని ఆయన విమర్శించారు. జాతీయ గౌరవం అనే పదం ఎప్పుడూ గుర్తుకు రాదా అని ఒవైసీ ప్రశ్నిస్తూ, చైనా సరిహద్దు ఆక్రమణ, 2015లో ప్రధాని మోదీ కొరియా పర్యటన సందర్భంగా చేసిన వ్యాఖ్యలు, మణిపూర్‌లో మహిళలపై జరిగిన హింస వంటి ఘటనలను ఎత్తి చూపారు. "చైనా మన భూమిని ఆక్రమించుకున్నప్పుడు జాతీయ గౌరవం ఎక్కడ ఉంది? 2015లో కొరియాలో ప్రధాని మాట్లాడుతూ భారతీయులు తాము భారతదేశం నుంచి వచ్చామని చెప్పుకోవడానికి సిగ్గుపడతారన్నారు. అదే సంవత్సరం ప్రధాని అమెరికా అధ్యక్షుడికి భారత జెండాను బహుమతిగా ఇస్తే, దాన్ని వంటమనిషి వికాస్ ఖన్నాకు ఇచ్చారు. అప్పుడు జాతీయ గౌరవం గుర్తుకు రాలేదా?" అని ఆయన నిలదీశారు. మణిపూర్‌లో మహిళలపై దాడులు జరిగినప్పుడు బీజేపీ, ప్రధాని మోదీ జాతీయ గౌరవాన్ని ఎందుకు గుర్తుపెట్టుకోలేదని ప్రశ్నించారు.

జాతీయ గీతం 'జనగణమన' దేశ ప్రజలను ప్రతిబింబిస్తుందని, 'వందేమాతరం' దేవతా స్తుతి అని ఒవైసీ అభిప్రాయపడ్డారు. స్వాతంత్య్ర పోరాటంలో ప్రాణాలు అర్పించిన మౌలానా మహమూద్ హసన్, హుసేన్ అహ్మద్ మదనీ, మౌలానా అబుల్ కలాం ఆజాద్ వంటి ముస్లిం యోధుల త్యాగాలను ఇప్పుడు జాతీయ గీతం పేరుతో విస్మరించడం సరికాదన్నారు. 1950లో రాష్ట్రపతి రాజేంద్ర ప్రసాద్ తీర్మానం లేకుండానే 'వందేమాతరం'ను జాతీయ గీతంగా ప్రకటించారని, ఇది పెద్ద తప్పు అని ఒవైసీ విమర్శించారు. ప్రభుత్వం ఈ విధంగా దేశ ప్రజలపై బలవంతంగా రుద్దడం తప్పు అని ఆయన స్పష్టం చేశారు.