పాకిస్తాన్, భారత సరిహద్దు వెంబడి 250 చైనా SH-15 ఫిరంగులను మోహరించింది: నిఘా వర్గాలు

పాకిస్తాన్ తన సరిహద్దులో 250 చైనా నిర్మిత SH-15 సెల్ఫ్ ప్రొపెల్డ్ హోవిట్జర్ ఫిరంగులను మోహరించినట్టు నిఘా వర్గాలు తెలిపాయి.

ఈ ఫిరంగులు ఉత్తరం నుంచి దక్షిణం వరకు భారత సరిహద్దు వెంబడి మోహరించబడ్డాయి. ఇటీవల భారత్ చేపట్టిన ఆపరేషన్ సింధూర్, ఇతర కౌంటర్ టెర్రరిజం చర్యలతో పాక్ రక్షణ వ్యవస్థ ఒత్తిడికి గురైన నేపథ్యంలో ఈ పరిణామం చోటుచేసుకుంది.

SH-15 ఫిరంగులను చైనా ప్రభుత్వ రక్షణ సంస్థ నారిన్కో తయారు చేస్తోంది. ఇవి చైనా పీపుల్స్ లిబరేషన్ ఆర్మీ వాడే PCL-181 మోడల్ ఎగుమతి వెర్షన్. 6x6 సాయుధ ట్రక్కుపై అమర్చిన ఈ ఫిరంగి గంటకు 90 కి.మీ వేగంతో కదలగలదు. కొండ ప్రాంతాల్లోనూ సులువుగా స్థానం మార్చుకోగలదని నిఘా వర్గాలు పేర్కొన్నాయి.

155 mm/52 క్యాలిబర్ సామర్థ్యమున్న ఈ ఫిరంగి సాధారణ NATO మందుగుండుతో 30-40 కి.మీ దూరం వరకు లక్ష్యాలను ఛేదించగలదు. రాకెట్ ఆధారిత ప్రత్యేక ప్రక్షేపకాలతో 53-72 కి.మీ దూరం వరకు దాడి చేయగలదు. దీంతో సరిహద్దుకు అవతలే ఉంటూ భారత స్థావరాలపై దాడి చేసే అవకాశం ఉందని నిపుణులు హెచ్చరిస్తున్నారు.

ఈ పరిణామంపై భారత సైన్యం స్పందించాల్సి ఉంది.