తమిళనాడులో 1200 ఏళ్ల నాటి దేవత విగ్రహాలు బయటపడ్డాయి

తమిళనాడులోని విల్లుపురం జిల్లా తిండివనం సమీపంలో రెండు ప్రాచీన దేవత విగ్రహాలు బయటపడ్డాయి. ఇవి సుమారు 1200 ఏళ్ల క్రితానికి చెందినవని చరిత్రకారులు గుర్తించారు.

పరిశోధకుడు సెంగుట్టువన్ నిర్వహించిన ఫీల్డ్ సర్వేలో ఈ విగ్రహాలు లభ్యమయ్యాయి. ఒక విగ్రహం గ్రామ దేవతకు చెందినది. మరొకటి యుద్ధ దేవత కొట్రవైగా భావిస్తున్నారు. ఇవి పల్లవుల కాలానికి చెందిన క్రీస్తు శకం 8వ శతాబ్దపు శిల్పాలని నిపుణులు తెలిపారు.

గ్రామదేవత శిల్పంలో తలపై కిరీటం, పెద్ద చెవిపోగులు, మెడలో హారం ఉన్నాయి. కుడివైపు కుమారుడు, ఎడమవైపు కుమార్తె చిత్రించబడ్డారు. దేవి ఆయుధం చీపురు ఆకృతి కూడా దీనిపై కనిపిస్తుంది. కొట్రవై దేవత శిల్పాన్ని ఎనిమిది చేతులతో తీర్చిదిద్దారు. దున్నపోతు తలపై నిలబడి, కుడిపాదం దగ్గర జింక ఉన్నట్లు చెక్కారు. తమిళ సంస్కృతిలో యుద్ధ విజయానికి ప్రతీకగా కొట్రవై దేవతను కొలుస్తారు.

ఈ విగ్రహాలు పల్లవుల కళా నైపుణ్యానికి నిదర్శనమని పరిశోధకులు వెల్లడించారు. ఈ ప్రదేశంలో మరిన్ని తవ్వకాలు జరిపే అవకాశం ఉంది.