పేపర్ లీక్‌కు కఠిన చర్యల బిల్లు రాజ్యసభలో: జైలు 10 ఏళ్లు, జరిమానా ₹50 లక్షలు

రాజ్యసభలో పరీక్షా పేపర్ లీక్‌లను అరికట్టేందుకు కేంద్రం శుక్రవారం ‘పబ్లిక్ ఎగ్జామినేషన్స్ (అన్ఫెయిర్ మీన్స్ ప్రివెన్షన్) సవరణ బిల్లు-2026’ ప్రవేశపెట్టింది. లోక్‌సభలో 10 గంటల చర్చ అనంతరం ఆమోదం పొందిన ఈ బిల్లు ఎగువ సభ ముందుకు వచ్చింది.

కేంద్ర మంత్రి ధర్మేంద్ర ప్రధాన్ బిల్లును ప్రవేశపెడుతూ, 2024 నాటి యాంటీ పేపర్ లీక్ చట్టాన్ని మరింత కఠినతరం చేసే లక్ష్యంతో దీన్ని తీసుకొచ్చామన్నారు. సవరణ ప్రకారం పేపర్ లీక్ నేరస్తులకు గతంలో 3-5 ఏళ్ల జైలు శిక్ష, రూ.10 లక్షల జరిమానా ఉండగా, ఇప్పుడు శిక్ష 5-10 ఏళ్లకు, జరిమానా రూ.50 లక్షలకు పెంచారు. పరీక్ష నిర్వహణలో సహకరించే సర్వీస్ ప్రొవైడర్లు, కాంట్రాక్టర్లు కూడా ఈ చట్టం పరిధిలోకి వస్తారు.

దర్యాప్తు 2 నెలల్లో, విచారణ 3 నెలల్లో పూర్తి చేయాలని నిబంధన విధించారు. ఇటీవలి పేపర్ లీక్ కేసులో సీబీఐ ఛార్జిషీటు దాఖలు చేయగా, నిన్నటి నుంచి విచారణ ప్రారంభమైందని మంత్రి తెలిపారు.

2010-2026 మధ్య రైల్వే రిక్రూట్‌మెంట్ బోర్డు, ఎయిమ్స్, ఏఐఈఈఈ, యూపీ ప్రావిన్షియల్ సర్వీసెస్, రాజస్థాన్ పోలీసు కానిస్టేబుల్ రిక్రూట్‌మెంట్, ఝార్ఖండ్ పబ్లిక్ సర్వీస్ కమిషన్ తదితర వాటిలో జరిగిన పెద్ద లీక్‌లను ఉదహరిస్తూ, ఈ సమస్య దేశవ్యాప్తమని మంత్రి చెప్పారు. ప్రతిపక్షాలు నినాదాలు చేస్తూ అంతరాయం కలిగించినా, మంత్రి ప్రసంగం కొనసాగించారు. అంతకుముందు గత ప్రభుత్వాలు జాతీయ టెస్టింగ్ ఏజెన్సీ ఏర్పాటు చేయకపోవడంపై విమర్శలు చేశారు.

ప్రధాని మోదీ విద్యార్థుల భవిష్యత్తుకు భంగం కలగనివ్వబోమని హామీ ఇచ్చారని, పేపర్ లీక్ పై ‘జీరో టాలరెన్స్’ విధానమే తమ ప్రభుత్వం అనుసరిస్తుందని మంత్రి స్పష్టం చేశారు.