ఢిల్లీలో ఎంపీ పప్పు యాదవ్ పై కత్తితో దాడి యత్నం; దాడి చేసిన వ్యక్తిని అదుపులోకి తీసుకున్న పోలీసులు

లోక్సభ ఎంపీ పప్పు యాదవ్ పై ఢిల్లీలోని తన అధికారిక నివాసంలో జరిగిన విలేకరుల సమావేశంలో కత్తితో దాడి చేసే యత్నం జరిగింది. ఓ వ్యక్తి ఆకస్మికంగా లోపలికి చొరబడి కత్తితో ఎంపీని దాడి చేసేందుకు ప్రయత్నించాడు.

వెంటనే పప్పు యాదవ్ అనుచరులు ఆ వ్యక్తిని పట్టుకుని కింద పడేశారు. ఘటనపై సమాచారం అందుకున్న ఢిల్లీ పోలీసులు వెంటనే అక్కడికి చేరుకుని, కత్తితో దాడి చేసిన వ్యక్తిని, మరికొందరిని అదుపులోకి తీసుకొని విచారిస్తున్నారు.

దాడి యత్నంపై స్పందించిన ఎంపీ పప్పు యాదవ్, తనను హతమార్చేందుకు కుట్ర జరిగిందని ఆరోపించారు. ఇలాంటి బెదిరింపులకు, దాడులకు తాను ఎంత మాత్రం భయపడనని స్పష్టం చేశారు.

ఇటీవల పార్లమెంట్ సమీపంలో పప్పు యాదవ్ చేసిన స్కిట్ వివాదాస్పదమైంది. అయోధ్య విరాళాల చోరీని వివరించేలా కాషాయ వస్త్రాలు ధరించి ప్రదర్శన ఇవ్వడంపై హిందూ సంఘాలు, బీజేపీ నేతలు నిరసన వ్యక్తం చేశారు. ఈ వివాదంలో పప్పు యాదవ్ పై కొన్ని చోట్ల కేసులు నమోదు అయ్యాయి. ఈ నేపథ్యంలో దాడి యత్నం జరగడం గమనార్హం.

ఈ ఘటనపై ఢిల్లీ పోలీసులు దర్యాప్తు కొనసాగిస్తున్నారు. దాడి చేసిన వ్యక్తి నేపథ్యం, సంభావ్య కుట్ర కోణంలో విచారణ జరుగుతోంది.