పార్లమెంట్ ప్రొరోగేషన్ లేకుండా 88 రోజులు: 2008 రికార్డు బద్దలు

పార్లమెంట్ వర్షాకాల సమావేశాలు ఆగస్టు 13న నిర్వధికంగా వాయిదా పడ్డాయి. అప్పటి నుంచి సమావేశాలు ముగిసినట్లు ప్రొరోగేషన్ ప్రకటన ఇంకా రాలేదు. దీంతో ప్రొరోగేషన్ లేకుండా 88 రోజులు గడిచాయి. 2008లో నమోదైన 87 రోజుల రికార్డు ఇప్పుడు బద్దలైంది. పార్లమెంట్ సమావేశం జరగకుండా కూడా 89 రోజులు అవుతున్నాయి.

సాధారణంగా ఉభయ సభల అధ్యక్షులు సమావేశాలను నిర్వధికంగా వాయిదా వేసిన రెండు, మూడు రోజుల్లోనే రాష్ట్రపతి ప్రొరోగేషన్ ప్రకటన జారీ చేస్తారు. ఈసారి ఆగస్టు 13 తర్వాత అలాంటి ప్రకటన రాలేదు. అంటే రాజ్యాంగంలోని ఆర్టికల్ 85 కింద వర్షాకాల సమావేశానికి జారీ చేసిన ఉత్తర్వులు ఇప్పటికీ అమల్లో ఉన్నట్లే. సమావేశాలు ఇంకా ముగియలేదని దీని అర్థం.

2008లో అప్పటి UPA ప్రభుత్వంపై అవిశ్వాస తీర్మానంపై చర్చ కోసం లోక్‌సభ జూలై 21, 22 తేదీల్లో రెండు రోజులు సమావేశమైంది. ఆ తర్వాత సభ నిర్వధికంగా వాయిదా పడింది. 87 రోజుల తర్వాత అక్టోబర్ 17న మళ్లీ సమావేశం ఏర్పాటు చేశారు. ఆ రికార్డే ఇప్పుడు బద్దలైంది.

ప్రొరోగేషన్ ప్రకటన రాకపోవడంపై కాంగ్రెస్ సహా విపక్షాలు ఆందోళన వ్యక్తం చేశాయి. డీలిమిటేషన్ బిల్లును ఆమోదించుకునేందుకు అవసరమైన మెజారిటీ కూడగట్టుకునేందుకు ప్రభుత్వం జాప్యం చేస్తోందని విపక్ష నేతలు ఆరోపించారు. ఈ బిల్లును కేంద్ర ప్రభుత్వం ఏప్రిల్ 17న లోక్‌సభలో ప్రవేశపెట్టింది. సరిపడా సంఖ్యాబలం లేక అది ఆమోదం పొందలేదు. ఈ బిల్లు ఆమోదం పొందితే లోక్‌సభ సభ్యుల సంఖ్య 543 నుంచి 850కి పెరుగుతుంది.

ఈ అంశంపై కేంద్ర ప్రభుత్వం స్పందన లభ్యం కాలేదు. మహిళా రిజర్వేషన్ చట్టాన్ని అమలు చేసేందుకు వీలుగా నియోజకవర్గాల పునర్విభజన బిల్లు కోసం ప్రత్యేక సమావేశాలు నిర్వహించే అవకాశం ఉందని ప్రచారం జరుగుతోంది.

శీతాకాల సమావేశాలను డిసెంబర్ 4 నుంచి 22 వరకు 15 రోజుల పాటు నిర్వహించే అవకాశం ఉన్నట్లు సమాచారం. దీనిపై ఈ వారంలో ప్రకటన రావచ్చని తెలుస్తోంది.