AC రైలు కోచ్‌లో దీపం వెలిగించి పూజ చేసిన ప్రయాణికుడి వీడియో వైరల్; రైల్వే శాఖ స్పందన

ఒక ప్రయాణికుడు AC రైలు కోచ్‌లోని అప్పర్ బెర్త్ పై దీపం, అగరబత్తులు వెలిగించి పూజ చేస్తున్న వీడియో సోషల్ మీడియాలో వైరల్ అయింది.

వీడియోలో, ఆ ప్రయాణికుడు పద్మాసనం వేసి ప్రమిది వెలిగించి, అగరబత్తులు అంటించడం కనిపించింది. మూసి ఉన్న AC కోచ్‌లో పొగ దట్టంగా కమ్మేయడంతో సహప్రయాణికులు ఊపిరాడక ఇబ్బంది పడ్డారు. కర్టన్లు, బెడ్ షీట్లు తేలిగ్గా మంటలకు చిక్కే అవకాశం ఉండటంతో పాటు, ఫైర్ అలారం మోగి ఎమర్జెన్సీ బ్రేకులు పడే ప్రమాదం ఉందని ఓ ప్రయాణికుడు గట్టిగా చెప్పడంతో ఆ వ్యక్తి పూజ ఆపేశాడు.

వీడియో వైరల్ అయిన నేపథ్యంలో రైల్వే శాఖ స్పందించింది. రైలు నంబరు, పీఎన్‌ఆర్ వివరాలు ఇస్తే తగిన చర్యలు తీసుకుంటామని అధికారులు తెలిపారు. ఇప్పటి వరకు ఈ ఘటనపై ఎటువంటి అధికారిక ఫిర్యాదు నమోదు కాలేదు.