పవన్ కళ్యాణ్, భార్య ఆనా కొనిదెల పరస్పర అంగీకారంతో విడిపోతున్నట్లు ప్రకటన

ఏపీ డిప్యూటీ సీఎం, జనసేన అధినేత పవన్ కళ్యాణ్, ఆయన భార్య ఆనా కొనిదెల విడిపోతున్నట్లు ప్రకటించారు. పరస్పర అంగీకారంతో ఈ నిర్ణయం తీసుకున్నట్లు ఇద్దరూ తెలిపారు.

తమ వ్యక్తిగత గోప్యతను గౌరవించాలని వారు కోరారు. 2013లో వివాహం చేసుకున్న ఈ జంట, 13 ఏళ్ల తర్వాత విడిపోవాలని నిర్ణయించుకుంది. ఇకపై మంచి స్నేహితులుగా ఉంటామని చెప్పారు. పిల్లలకు బాధ్యతాయుతమైన తల్లిదండ్రులుగా కొనసాగుతామని తెలిపారు. తమ ప్రయాణంలో వెంట నిలిచిన ప్రతి ఒక్కరికి ధన్యవాదాలు తెలిపారు.

ఇంతకుముందు పవన్ కళ్యాణ్‌కు నందినితో మొదటి వివాహం, నటి రేణు దేశాయ్‌తో రెండో వివాహం జరిగాయి. ఆ రెండు బంధాలు విడాకులతో ముగిశాయి.

ఈ ప్రకటన తర్వాత ఏపీలో రాజకీయ పార్టీలు కీలక సూచనలు చేశాయి. నాయకుల వ్యక్తిగత జీవితాలపై అనుచిత వ్యాఖ్యలు చేయొద్దని TDP, YSRCP పార్టీలు తమ శ్రేణులకు స్పష్టం చేశాయి. కూటమి నేతలు, YSRCP నాయకుల వ్యక్తిగత జీవితాలపై వ్యాఖ్యలు ఆమోదయోగ్యం కాదని TDP తెలిపింది. సోషల్ మీడియాలో సంయమనం పాటించాలని సూచించింది. నిబంధనలు ఉల్లంఘిస్తే క్రమశిక్షణ చర్యలు తప్పవని హెచ్చరించింది. వ్యక్తిగత విమర్శలకు దూరంగా ఉండాలని, అలాంటి పోస్టులను షేర్ చేయొద్దని YSRCP నాయకులు, కార్యకర్తలకు సూచించింది. బహిరంగ వేదికల్లో బాధ్యతగా వ్యవహరించాలని పేర్కొంది.

నటి రేణు దేశాయ్ కూడా ఈ అంశంపై స్పందించారు. ఇది పూర్తిగా పవన్ కళ్యాణ్ వ్యక్తిగత విషయం కాబట్టి తాను దానిపై ఎలాంటి వ్యాఖ్య చేయబోనని ఆమె అన్నారు. ఒక వ్యక్తి కష్టంలో ఉన్నప్పుడు దూషించడం నైతికత కాదని ఇన్‌స్టాగ్రామ్ పోస్ట్‌లో పేర్కొన్నారు. ఎవరైనా మనుషులేనని, కింద పడిన వారిని తొక్కడం అమానవీయమని ఆ పోస్ట్‌లో రాశారు.