మాదాపూర్ తుమ్మిడికుంట చెరువు సుందరీకరణ పూర్తి; రేవంత్ రెడ్డి ప్రారంభం

హైదరాబాద్‌లోని మాదాపూర్ తుమ్మిడికుంట చెరువు సుందరీకరణ పనులు పూర్తయ్యాయి. ఈ చెరువును ముఖ్యమంత్రి రేవంత్ రెడ్డి సాయంత్రం ప్రారంభించనున్నారు. HYDRAA ఆధ్వర్యంలో ఈ పునరుద్ధరణ పనులు చేపట్టారు.

చెరువు అభివృద్ధిలో భాగంగా FTL పరిధిలో తమ ఇళ్లను కోల్పోయిన వారికి ఇందిరమ్మ ఇళ్ల పత్రాలను ముఖ్యమంత్రి అందజేయనున్నారు. నటుడు అక్కినేని నాగార్జున గౌరవ అతిథిగా ఈ కార్యక్రమానికి హాజరవుతున్నారు. చెరువు అభివృద్ధికి ఆయన సహకరించినట్లు సమాచారం.

HYDRAA కమిషనర్ AV రంగనాథ్, ఎమ్మెల్యే గాంధీ, సీనియర్ పోలీసు అధికారులు కలిసి ఏర్పాట్లను పరిశీలించారు. శుద్ధి చేసిన నీటిని మాత్రమే చెరువులోకి తరలించేలా STP వ్యవస్థలను ఏర్పాటు చేశారు. ఇన్‌లెట్లను అభివృద్ధి చేయడం వల్ల శిల్పారామం పరిసరాల్లో వరద ముప్పు తప్పుతుందని అధికారులు అంచనా వేస్తున్నారు.

గతంలో వర్షం పడగానే శిల్పారామం ప్రాంతంలో నడుము లోతు నీరు చేరేది. వాహనదారులు, స్థానికులు తీవ్ర ఇబ్బందులు పడేవారు. ఈ చెరువు నుంచి 30 వేల ట్రక్కులకు పైగా పూడిక తొలగించారు. నిర్మాణ వ్యర్థాలు, చెత్త, బయోమెడికల్ వేస్ట్ డంపింగ్ యార్డ్‌గా ఉన్న ప్రాంతం ఇప్పుడు పర్యావరణ హితంగా మారింది.

చెరువు చుట్టూ 1.6 కిలోమీటర్ల పాత్‌వే, ఓపెన్ జిమ్, పిల్లల ఆట స్థలం ఏర్పాటు చేశారు. వేలాది మొక్కలు నాటి పచ్చదనానికి ప్రాధాన్యం ఇచ్చారు. వేదిక మధ్యలో 60 ఏళ్ల బోన్సాయి మొక్క ఆకర్షణగా నిలిచింది. కొండాపూర్ పోలీస్ బెటాలియన్ వైపు నుంచి వచ్చే వరద నీరు కూడా నేరుగా చెరువులోకి చేరేలా చర్యలు తీసుకోవాలని స్థానికులు కోరుతున్నారు.