అక్రమ అండాల సేకరణ: 22 ART కేంద్రాల్లో తనిఖీలు, 7 ఆసుపత్రులపై చర్యలు

హైదరాబాద్‌లో ఐవీఎఫ్ కేంద్రాల్లో అక్రమంగా అండాలు సేకరిస్తున్నట్టు వచ్చిన ఆరోపణలపై పోలీసులు, వైద్య ఆరోగ్య శాఖ అధికారులు ఉమ్మడిగా దర్యాప్తు చేపట్టారు. రాష్ట్రవ్యాప్తంగా ఉన్న 44 ART కేంద్రాల్లో 22 కేంద్రాలపై ఇప్పటివరకు తనిఖీలు జరిపినట్టు అధికారులు తెలిపారు.

తనిఖీల్లో నిబంధనల ఉల్లంఘనలు బయటపడ్డాయి. 20 ఫెర్టిలిటీ కేంద్రాలకు అధికారులు నోటీసులు జారీ చేశారు. ఏడు ఆసుపత్రుల్లో నిబంధనలు ఉల్లంఘించినట్టు గుర్తించారు. ఏడు ఐవీఎఫ్ కేంద్రాలకు షోకాజ్ నోటీసులు ఇచ్చారు.

ఉద్యోగాల పేరుతో యువతులను హైదరాబాద్‌కు తీసుకొచ్చి, మంచి జీతం, వసతి ఇస్తామని ఒప్పించి, హాస్టళ్లలో ఉంచి పదే పదే అండాలు సేకరిస్తున్నట్టు దర్యాప్తులో వెల్లడైంది. 31 మంది నుంచి పునరావృతంగా అండాలు సేకరించినట్టు అధికారులు గుర్తించారు. వారిలో చాలామంది ఇతర రాష్ట్రాలకు చెందినవారు. ఈ యువతుల వివరాలను నకిలీ ఆధార్ కార్డులతో మార్చినట్టు గుర్తించారు. నకిలీ ఆధార్ కార్డుల తయారీలో కీలకంగా ఉన్న ప్రవీణ్‌ను బేగంపేట పోలీసులు అరెస్టు చేశారు.

ఈ దందాలో నాలుగు నుంచి ఐదు గ్యాంగ్‌లు వేర్వేరు పనులు చేస్తున్నట్టు పోలీసులు గుర్తించారు. ఒక గ్యాంగ్ ఉద్యోగాల పేరుతో యువతులను తీసుకొస్తోంది. మరో గ్యాంగ్ హాస్టళ్ల పేరుతో వారిని ఉంచుతోంది. మరో గ్యాంగ్ వారిని ఒప్పించే పని చేస్తోంది. ఆసుపత్రుల ముసుగులో ఒక గ్యాంగ్, నకిలీ ఆధార్ పత్రాలు సృష్టించేందుకు మరో గ్యాంగ్ పనిచేస్తున్నట్టు తెలిసింది. అండాలను అమ్మేందుకు కూడా మరో గ్యాంగ్ ఉన్నట్టు గుర్తించారు. ఈ కేసుపై పోలీసులతో పాటు వైద్యశాఖకు చెందిన 10 టాస్క్ ఫోర్స్ బృందాలు దర్యాప్తు చేస్తున్నాయి.

ఐదు ఐవీఎఫ్ కేంద్రాలకు మహిళా కమిషన్ ఇటీవల నోటీసులు ఇచ్చింది. విచారణ సమయంలో హుసేన్ అనే వ్యక్తి పేరు ప్రధానంగా ప్రస్తావనకు వచ్చిందని కమిషన్ చైర్‌పర్సన్ మీడియాకు తెలిపారు. ఆ వ్యక్తిని అదుపులోకి తీసుకుంటే ఈ దందాకు సంబంధించిన పూర్తి వివరాలు బయటపడతాయని ఆమె అభిప్రాయపడ్డారు. ఈ పేరును పోలీసులు, వైద్య ఆరోగ్య శాఖ అధికారులు ఇప్పటివరకు ప్రస్తావించలేదు.

పునరావృతంగా అండాలు ఇచ్చిన 31 మంది ఆచూకీ కోసం పోలీసులు గాలిస్తున్నారు. దర్యాప్తు కొనసాగుతోంది.