స్థానిక సంస్థల ఫలితాలపై కూటమిలో సంబరాలు, YSRCP విమర్శలు

ఆంధ్రప్రదేశ్‌లో స్థానిక సంస్థల ఎన్నికల ఫలితాలపై రాజకీయ పార్టీల మధ్య మాటల యుద్ధం కొనసాగుతోంది. అధికార కూటమి ఫలితాలను విజయంగా చెప్పుకుంటుండగా, YSRCP విమర్శలు చేస్తోంది.

మున్సిపల్, MPTC, ZPTC ఎన్నికల ఫలితాలు కూటమికి బూస్ట్ ఇచ్చాయని TDP, జనసేన, BJP నేతలు భావిస్తున్నారు. అఖండ విజయం దక్కిందంటూ పలు చోట్ల విజయోత్సవ ర్యాలీలు నిర్వహించారు.

అయితే విజయ గర్వం వద్దని CM చంద్రబాబు నాయుడు నేతలకు సూచించారు. ఒద్దికగా ఉండాలని, టార్గెట్‌తో పని చేయాలని మంత్రులకు ఆయన చెప్పారు. ఎన్నికల వరకే రాజకీయం అని, ఆ తర్వాత ప్రజలకు మేలు చేయడమే ప్రజా ప్రతినిధుల లక్ష్యం అని అన్నారు. 2029 ఎన్నికలను టార్గెట్‌గా పెట్టుకుని పని చేయాలని సూచించారు. మూడు పార్టీల నేతలు సమిష్టిగా ముందుకు వెళ్లాలని చెప్పారు.

BJP MP పురందేశ్వరి కూడా ఈ అంశంపై స్పందించారు. తమకు కేటాయించిన MPTC సీట్లలో 59 శాతానికి పైగా గెలిచామని ఆమె తెలిపారు. ఫలితాలపై సోషల్ మీడియాలో దుష్ప్రచారం జరుగుతోందని ఆమె అన్నారు. దానిపై అందరూ ఆత్మవిమర్శ చేసుకోవాలని కోరారు.

మరోవైపు 2024 అసెంబ్లీ ఎన్నికలతో పోల్చితే తమ గ్రాఫ్ పెరిగిందని YSRCP చెప్తోంది. ఏకపక్షంగా ఎన్నికలు నిర్వహించి గెలిచామంటూ కూటమి గొప్పలు చెప్పుకుంటోందని ఆ పార్టీ విమర్శించింది. రాబోయే ఎన్నికల కోసం క్యాడర్‌ను సిద్ధం చేసుకోవడంపై పార్టీలు దృష్టి పెట్టాయి.