ఒకసారి నాటితే మూడేళ్ల పంట: బాపట్ల రైతు దొండ సాగుతో లాభాలు

బాపట్ల జిల్లా కర్లపాలెం మండలం పేరెల్లిపాడు గ్రామానికి చెందిన రైతు యేసుదాసు పరుచూరు వద్ద దొండ సాగు చేస్తున్నారు. ఒక ఎకరంలో చేపట్టిన ఈ సాగుకు ఖరీదైన ఇనుప స్తంభాలకు బదులుగా స్థానికంగా లభించే బొంగు కర్రలతో పందిరి నిర్మించారు. ఈ పందిరి ఏడేళ్ల వరకు మన్నికగా ఉంటుందని రైతు తెలిపారు.

దొండ మొక్కలు నాటిన మూడు నెలలకే దిగుబడి మొదలవుతుంది. ఒకసారి నాటిన మొక్కలు మూడేళ్ల పాటు నిరంతరం కాయలు అందిస్తాయి. వారం నుంచి 10 రోజులకు ఒకసారి కోత వేస్తారు. గుజరాత్ నుంచి 1200 దుంపలను ఒక్కొక్కటి రూ.25 చొప్పున తెప్పించారు. పందిరికి అల్లు పెట్టే పనికి రూ.40,000 ఖర్చయింది.

పండిన దొండ కాయలను చిలకలూరిపేట, అత్త మాట్లూరు వంటి చుట్టుపక్కల మార్కెట్లలో వ్యాపారులకు నేరుగా విక్రయిస్తున్నారు. కిలో ధర రూ.20 నుంచి రూ.40 వరకు హెచ్చుతగ్గులుగా ఉండగా, ఏటా ఎకరానికి సగటున రూ.10 లక్షల ఆదాయం వస్తోందని యేసుదాసు తెలిపారు. పంటకు నాణ్యమైన పురుగు మందులను వాడుతూ పచ్చ పురుగు బెడద నివారిస్తున్నట్టు చెప్పారు. ఇతర పంటలతో నష్టపోయిన రైతులు దొండ సాగు వైపు మొగ్గు చూపితే స్థిరమైన ఆదాయం పొందవచ్చని సూచించారు.