ప్రధాని మోదీ ఐఐటియన్లకు పిలుపు: పరిశోధన, అభివృద్ధి, ఆవిష్కరణలపై దృష్టి పెట్టాలి

ప్రధాని నరేంద్ర మోదీ ఐఐటి విద్యార్థులకు పరిశోధన, అభివృద్ధి, ఆవిష్కరణల వైపు మొగ్గు చూపాలని పిలుపునిచ్చారు. దేశంలో నూతన ఆవిష్కరణలు, సైన్స్‌కు ఊతమిచ్చేలా ప్రభుత్వం అనేక పథకాలు అమలు చేస్తోందని, యువత వీటిని సద్వినియోగం చేసుకోవాలని ఆయన కోరారు.

మోదీ మాట్లాడుతూ, 'రీసెర్చ్, డెవలప్‌మెంట్ అండ్ ఇన్నోవేషన్ స్కీమ్' ద్వారా ఆలోచనలను ఆచరణలో పెట్టే అవకాశం లభిస్తుందని తెలిపారు. ప్రధాన మంత్రి రీసెర్చ్ ఫెలోషిప్ ప్రతిభావంతులైన యువతకు పరిశోధన చేసేందుకు అవకాశం కల్పిస్తోందన్నారు. దీంతోపాటు నేషనల్ రీసెర్చ్ ఫౌండేషన్ ఏర్పాటు దేశంలో సైన్స్‌కు కొత్త శక్తినిస్తుందని వివరించారు.

పరిశోధన రంగంలో సుమారు రూ.1 లక్ష కోట్ల నిధులు సమీకరించేలా ప్రభుత్వం ప్రణాళిక రూపొందించిందని మోదీ ప్రకటించారు. ఈ నిధులు కొత్త టెక్నాలజీ, వైద్య పరిశోధన, క్వాంటం కంప్యూటింగ్ వంటి రంగాల్లో ఎదుగుదలకు దోహదపడతాయని చెప్పారు.

ఇటీవలి కేంద్ర బడ్జెట్‌లో పరిశోధనకు పెద్దపీట వేసిన నేపథ్యంలో ఈ ప్రకటన ప్రాధాన్యం సంతరించుకుంది. ఐఐటి గ్రాడ్యుయేట్లు దేశీయంగా ఉండి స్టార్టప్‌లు, పేటెంట్ల ద్వారా భారత్‌ను ఆత్మనిర్భరంగా తీర్చిదిద్దాలన్నది ప్రధాని సందేశం.