కొత్త ఎంపీలకు ప్రధాని మోదీ అల్పాహార విందు; సోషల్ మీడియా రిపోర్ట్ కార్డులు పంపిణీ

ప్రధాని నరేంద్ర మోదీ కొత్తగా ఎన్నికైన లోక్‌సభ, రాజ్యసభ ఎంపీలకు అల్పాహార విందు ఇచ్చారు. ఈ విందులో టీడీపీ, జనసేన ఎంపీలు పాల్గొన్నారు. రాజ్యసభ టీడీపీ ఎంపీ చింతకాయల విజయ్ ప్రధానికి మంగళగిరి చేనేత కండువా కప్పి శుభాకాంక్షలు తెలిపారు.

చింతకాయల విజయ్ మాట్లాడుతూ, ప్రధాని మోదీ ప్రతి ఎంపీకీ సోషల్ మీడియా రిపోర్ట్ కార్డు ఇచ్చారని చెప్పారు. ఫేస్‌బుక్, ఇన్‌స్టాగ్రామ్ ఫాలోవర్లు, ఎంగేజ్‌మెంట్ వివరాలు అందులో ఉన్నాయన్నారు. మెరుగుపరచుకోవాల్సిన అంశాలపై సూచనలు కూడా ఇచ్చారని ఆయన తెలిపారు.

ఎంపీలు సోషల్ మీడియాలో చురుకుగా ఉండాలని, ప్రజలతో టచ్‌లో ఉండి లేఖలు రాయాలని మోదీ సూచించినట్లు విజయ్ పేర్కొన్నారు. పార్లమెంటుకు రోజూ హాజరు కావడం, లైబ్రరీని వినియోగించుకోవడం, 40 ఏళ్ల దాటిన తర్వాత రెగ్యులర్ హెల్త్ చెకప్, యోగా చేయాలన్న సలహాలు ఇచ్చారన్నారు. గ్రామీణ కళలు, ఎటికొప్పాక బొమ్మల వంటి స్థానిక ఉత్పత్తులను ప్రోత్సహించాలని కూడా మోదీ చెప్పినట్లు విజయ్ వివరించారు.

ఈ సందర్భంగా ప్రధాని మోదీ, ఆంధ్రప్రదేశ్ సురక్షితమైన చేతుల్లో ఉందని వ్యాఖ్యానించినట్లు చింతకాయల విజయ్ పేర్కొన్నారు. ఎంత ఎదిగినా వినయంగా ఉండడాన్ని మోదీ నుంచి నేర్చుకున్నామని ఆయన అన్నారు.