ఏకతా దివస్ ఇప్పుడు ప్రజా భాగస్వామ్య ఉత్సవం: ప్రధాని మోదీ

స్వాతంత్ర్య దినోత్సవం, గణతంత్ర దినోత్సవం, ఏకతా దివస్ అనే మూడు జాతీయ పర్వదినాలను దేశం ఇప్పుడు పూర్తి ఉత్సాహంతో జరుపుకుంటోందని ప్రధాని నరేంద్ర మోదీ అన్నారు. గుజరాత్‌లోని ఏకతా నగర్ (కేవడియా)లో జరిగిన జాతీయ ఏకతా దివస్ వేడుకల్లో ఆయన మాట్లాడారు. ఈ ఏడాది జాతీయ ఏకతా పరేడ్ అద్భుతంగా జరిగిందని, ఆ పరేడ్ పోలీసులు, భద్రతా బలగాల శౌర్యానికి, సాహసానికి అంకితమని ప్రధాని తెలిపారు.

ఈ పరేడ్‌లోని టాబ్లోలు దేశ వారసత్వాన్ని, దేశ ఆకాంక్షలను ప్రదర్శించాయని మోదీ చెప్పారు. ఏకతా దివస్ ఇప్పుడు కేవలం కార్యక్రమాలకే పరిమితం కాలేదని, ప్రజా భాగస్వామ్యం నుంచి ప్రజా గౌరవం వరకు విస్తరించిన ఉత్సవంగా మారిందని ఆయన అన్నారు. ఈ సందర్భంగా దేశ ప్రజలందరికీ ఆయన శుభాకాంక్షలు తెలిపారు.

జాతీయ ఏకతా దివస్ సందర్భంగా సర్దార్ వల్లభ్‌భాయ్ పటేల్‌కు ఆయన భక్తిపూర్వక నివాళి అర్పించారు. సర్దార్ పటేల్ లేని నేటి భారతాన్ని ఊహించుకోవడం కూడా కష్టమని, ఆయనే భారత ప్రస్తుత స్వరూపాన్ని తీర్చిదిద్దారని ప్రధాని కొనియాడారు. విభజన తర్వాత హిమాలయాల నుంచి హిందూ మహాసముద్రం వరకు భారత్‌ను కాపాడినది సర్దార్ పటేల్‌ేనని ఆయన గుర్తు చేశారు.

దేశ చరిత్రను, చైతన్యాన్ని బాగా తెలిసిన వ్యక్తి కావడం వల్లే సర్దార్ పటేల్ అది సాధించగలిగారని మోదీ అన్నారు. భారత వైవిధ్యం అడ్డంకి కాదు, అదే దేశ ఐక్యతకు నిజమైన ఆధారం అని ఆయన గుర్తించారని ప్రధాని పేర్కొన్నారు. ఐక్యత ప్రజల పట్ల జవాబుదారీతనాన్ని గుర్తు చేస్తుందని, ఒక జాతిగా ముందుకు సాగే శక్తిని ఇస్తుందని ఆయన వ్యాఖ్యానించారు.