విరోధ పక్షం కాదు, అవరోధ పక్షంగా మారింది: ప్రధాని మోదీ ఆరోపణ

దేశంలో ప్రతిపక్షం తన కర్తవ్యాన్ని విడిచిపెట్టి, విరోధం చేయడం కాకుండా అవరోధం సృష్టించే పక్షంగా మారిపోయిందని ప్రధాని నరేంద్ర మోదీ ఆరోపించారు. రాష్ట్రీయ ఏకతా దివస్ వేడుకల్లో ఆయన ప్రసంగిస్తూ ఈ విమర్శలు చేశారు.

ప్రజాస్వామ్యంలో ప్రతిపక్ష పక్షం బాధ్యత ప్రభుత్వ విధానాలను విరోధించడమేనని, కానీ ఇప్పుడు ప్రతిపక్షం ఆ బాధ్యతను త్యజించి అవరోధ పక్షంగా మారిందని ఆయన అన్నారు. తమ నిరాశ, నిస్పృహలో దేశ అభివృద్ధికి అడ్డంకులు సృష్టిస్తున్నారని, ఇది విరోధం కాదు, అవరోధమని మోదీ పేర్కొన్నారు. ఈ శక్తులు రాజ్యాంగ మర్యాదలను తారుమారు చేసుకుంటూ ముందుకు పోతున్నాయని ఆయన ఆరోపించారు.

దేశంలో విభజన కుట్రలు జరుగుతున్నాయని, మాతృభూమి సంతానాన్ని ఒకరికొకరు ఎదురుగా నిలబెట్టి కొట్టించుకునేలా కుట్రలు రచిస్తున్నారని ప్రధాని అన్నారు. దశాబ్దానికి పైగా కొనసాగుతున్న నిస్పృహ కారణంగా ఈ శక్తులు ఇప్పుడు బహిరంగంగా ముందుకు వచ్చాయని ఆయన విమర్శించారు. విదేశాల్లో ఎవరు గుప్తంగా ఎవరిని కలుస్తున్నారు, భారత వ్యతిరేక శక్తులు ఎవరికి మద్దతు ఇస్తున్నాయి, ఎవరు భారత శత్రువుల భాష మాట్లాడుతున్నారు అనే అంశాలను గుర్తించాల్సిన అవసరం ఉందని ఆయన పిలుపునిచ్చారు.

సోషల్ మీడియాను ఆయుధంగా ఉపయోగించి పుకార్లు వ్యాప్తి చేయడం, భారత ఇమేజీని దెబ్బతీయడం జరుగుతోందని మోదీ అన్నారు. దేశ ప్రజలు ఒక్కటై వీటిని ఎదుర్కోవాలని ఆయన కోరారు. సుదూర ప్రాంతాల్లో నక్సలిజాన్ని అంతం చేశామని, అయితే ‘మానసిక నక్సలిజం’ ముప్పు ఇంకా తొలగిపోలేదని ఆయన హెచ్చరించారు. దేశం ఎప్పుడూ అప్రమత్తంగా ఉండాలని ప్రధాని పేర్కొన్నారు. సర్దార్ వల్లభాయ్ పటేల్ జయంతి సందర్భంగా అక్టోబర్ 31న దేశవ్యాప్తంగా రాష్ట్రీయ ఏకతా దివస్ నిర్వహించడం ఆనవాయితీ.