జాతీయ చేనేత దినోత్సవం: చేనేత ఉత్పత్తులు కొనండి, GRWM వీడియోలు చేయండి – ప్రధాని మోదీ

ప్రధాని నరేంద్ర మోదీ జాతీయ చేనేత దినోత్సవం (ఆగస్టు 7) సందర్భంగా ప్రత్యేక వీడియో సందేశం విడుదల చేశారు. చేనేత కార్మికులను ఆర్థికంగా బలోపేతం చేయడమే లక్ష్యంగా ఈ సందేశం ఇచ్చారు.

1905 ఆగస్టు 7న స్వదేశీ ఉద్యమం ప్రారంభమైన నేపథ్యంలో, ఈ రోజును జాతీయ చేనేత దినోత్సవంగా నిర్వహిస్తున్నామని ప్రధాని గుర్తు చేశారు. ఆత్మనిర్భర భారత్ లక్ష్యంలో భాగంగా చిన్న చేనేత కుటుంబాలకు ఆర్థిక సహాయం అందించాలని, వారి ఉత్పత్తులను ప్రోత్సహించాలని ఆయన పిలుపునిచ్చారు.

"గత వారం ఫ్రెండ్‌షిప్ డే జరుపుకున్నారు. అదే ఉత్సాహంతో ఆగస్టు 7న చేనేత దినోత్సవాన్ని కూడా జరుపుకోవాలి" అని ఆయన వీడియోలో చెప్పారు. చేనేత ఉత్పత్తులను కొనుగోలు చేయడంతో పాటు, వాటితో GRWM (Get Ready With Me) వీడియోలు తయారుచేసి సోషల్ మీడియాలో షేర్ చేయాలని ప్రధాని విజ్ఞప్తి చేశారు. దీనివల్ల ప్రపంచానికి భారతీయ చేనేత నైపుణ్యం తెలుస్తుందని, చేనేత కార్మికులకు ప్రోత్సాహం లభిస్తుందని ఆయన అన్నారు.

చేనేత రంగానికి చెందిన అనేక వైవిధ్యమైన కలెక్షన్లు ఉన్నాయని, వాటిని ప్రోత్సహించడం ద్వారా దేశ ఆర్థిక వ్యవస్థ బలోపేతం అవుతుందని ప్రధాని పేర్కొన్నారు. చేనేత ఉత్పత్తులను వినియోగించడం, వాటి ప్రచారం చేయడం ప్రతి పౌరుడి బాధ్యత అని ఆయన ఉద్ఘాటించారు.