ఐఐటీ ఢిల్లీ కాన్వకేషన్‌లో ప్రధాని మోదీ: 'నేర్చుకుంటూ ఉండేవారే గెలుస్తారు'

ఢిల్లీలోని ఇండియన్ ఇన్స్టిట్యూట్ ఆఫ్ టెక్నాలజీ (ఐఐటీ) ఢిల్లీ స్నాతకోత్సవంలో ప్రధాని నరేంద్ర మోదీ శనివారం విద్యార్థులను ఉద్దేశించి మాట్లాడారు. ప్రపంచంలో సాంకేతికత, వ్యూహరచన, అధికార సమతుల్యత అత్యంత వేగంగా మారుతున్న నేపథ్యంలో నిరంతరం నేర్చుకోవడమే అత్యుత్తమ మార్గమని ఆయన అన్నారు. 'ఏమి జరుగుతుందో తెలియదు, కానీ నేర్చుకునేవారే గెలుస్తారు' అని ఉద్బోధించారు.

ఐఐటీ డిగ్రీ కేవలం పరీక్ష ఉత్తీర్ణత, ఉద్యోగ నియామకాలకు మాత్రమే పరిమితం కాదని, అది కఠినమైన సమస్యల్ని పరిష్కరించే నైపుణ్యానికి నిదర్శనమని ప్రధాని తెలిపారు. విద్యార్థులు క్యాంపస్‌లో ఎన్నో ఒడిదొడుకుల్ని ఎదుర్కొని చిన్న చిన్న అడుగులతో ఈ స్థాయికి చేరుకున్న విధానాన్ని గుర్తు చేశారు. జీవితంలోనూ అదే సూత్రం పాటించాలని, పెద్ద సవాలును చిన్న ముక్కలుగా విభజించి పరిష్కరించాలని సూచించారు.

'క్యాంపస్ లోపల సిలబస్ ఉంటుంది, బయట జీవితంలో మాత్రం ప్రతి ప్రశ్న అవుట్ ఆఫ్ సిలబస్‌గా ఉంటుంది' అని మోదీ వ్యాఖ్యానించారు. జీవితంలో అసలు ప్రశ్నేమిటో కూడా మనమే గుర్తించాల్సి ఉంటుందని, ఇప్పటివరకు ఎవరూ ప్రశ్నించని అంశాలపై దృష్టి పెట్టాలని సూచించారు. క్యూరియాసిటీ, సమస్య పరిష్కార సామర్థ్యాన్ని నిరంతరం కాపాడుకోవాలని విద్యార్థులకు పిలుపునిచ్చారు. ఐఐటీ అలుమ్నైలలో ఎంతో మంది సరైన ప్రశ్నల్ని గుర్తించి సమాధానం కనుగొనడం వల్లే అగ్రస్థానానికి చేరుకున్నారని గుర్తు చేశారు.

ఈ సంవత్సరం స్నాతకోత్సవంలో డిగ్రీలు అందుకున్న 2,500 మందికి పైగా విద్యార్థులతో పాటు పలువురు ప్రొఫెసర్లు, పరిశోధకులు ఈ కార్యక్రమంలో పాల్గొన్నారు.