ప్రధాని మోదీ 100 వారాల 'నశాముక్త్ యువా' వ్యతిరేక మాదకద్రవ్యాల ప్రచారం ప్రారంభం

ప్రధాని నరేంద్ర మోదీ దేశవ్యాప్తంగా 'నశాముక్త్ యువా ఫర్ వికసిత్ భారత్' పేరుతో 100 వారాల మాదకద్రవ్య వ్యతిరేక ప్రచార కార్యక్రమాన్ని ప్రారంభించారు. యువతను డ్రగ్స్ బారి నుంచి కాపాడటమే ఈ క్యాంపెయిన్ లక్ష్యం.

కార్యక్రమంలో కోటి మందికి పైగా యువత పాల్గొని మాదక ద్రవ్యాలకు దూరంగా ఉంటామని ప్రతిజ్ఞ చేసింది. ప్రధాని మోదీ మాట్లాడుతూ, డ్రగ్స్ రవాణాపై ప్రభుత్వం కఠిన చర్యలు తీసుకుంటుందని, యువత ఈ ఉద్యమానికి నాయకత్వం వహించాలని కోరారు.

గతంతో పోలిస్తే డ్రగ్ ట్రాఫికర్ల అరెస్టులు, వేల కోట్ల విలువైన మాదక ద్రవ్యాల స్వాధీనం గణనీయంగా పెరిగిందని ఆయన తెలిపారు. యువతను డ్రగ్స్ మాయలో ముంచేందుకు శత్రు దేశాలు కుట్రలు చేస్తున్నాయని, సమాజం మొత్తం కలిసి దీనిని తిప్పికొట్టాలని పిలుపునిచ్చారు.

వ్యసనానికి గురైన పిల్లలను పరువు పేరుతో దాచిపెట్టకుండా వెంటనే వైద్య సహాయం తీసుకోవాలని తల్లిదండ్రులకు ప్రధాని సూచించారు. కాలేజీలు, యూనివర్సిటీల్లో అధ్యాపకులు పాఠ్యాంశాలతో పాటు డ్రగ్స్ ప్రమాదాలపై విద్యార్థులకు అవగాహన కల్పించాలన్నారు.

100 వారాల పాటు సాగే ఈ ఉద్యమంలో ప్రతి ఆదివారం యువత నేతృత్వంలో అవగాహన ర్యాలీలు, ప్రత్యేక కార్యక్రమాలు నిర్వహిస్తారు. మై భారత్ వాలంటీర్లు, నేషనల్ సర్వీస్ స్కీమ్, యూత్ క్లబ్బులతో పాటు స్కూళ్లు, కాలేజీలు, పరిశ్రమల సంఘాలు, ఆధ్యాత్మిక సంస్థలు ఇందులో భాగస్వామ్యం వహిస్తాయి. పాల్గొనాలనుకునే వారు మై భారత్ ప్లాట్ఫామ్ ద్వారా రిజిస్టర్ చేసుకోవచ్చు.