ప్రధాని మోదీ ‘నశా ముక్త్ యువ’ అభియాన్‌ను ప్రారంభించారు; దేశవ్యాప్తంగా కోటి మంది యువత ప్రతిజ్ఞ

ప్రధాని నరేంద్ర మోదీ దేశవ్యాప్తంగా ‘నశా ముక్త్ యువ’ అభియాన్‌ను ప్రారంభించారు. ఈ సందర్భంగా 28,000కు పైగా ప్రదేశాల నుంచి ఒక కోటి మందికి పైగా యువత డ్రగ్స్‌కు దూరంగా ఉండాలని ప్రతిజ్ఞ తీసుకున్నారు. వికసిత్ భారత్ లక్ష్య సాధనలో యువత ఆరోగ్యంగా, ఆత్మవిశ్వాసంతో ఉండాలని, డ్రగ్స్ వంటి హానికర అలవాట్ల నుంచి విముక్తి పొందాలని ప్రధాని ఈ సందర్భంగా నొక్కి చెప్పారు.

గతేడాది కాశీ నుంచి పైలట్ ప్రాజెక్టుగా మొదలైన ఈ కార్యక్రమం ఇప్పుడు జాతీయ స్థాయికి చేరుకుంది. 125కు పైగా ఆధ్యాత్మిక సంస్థలు, సామాజిక సంఘాలు, ఎన్జీవోలు ఈ ఉద్యమంలో భాగస్వామ్యమయ్యాయి. కాశీ డిక్లరేషన్ ద్వారా ఒక రోడ్‌మ్యాప్‌ను కూడా రూపొందించారు. వంద వారాల పాటు కొనసాగే ఈ అభియాన్‌లో ప్రతి ఆదివారం కళ, సంస్కృతి, క్రీడలు, ధ్యానం, సేవా కార్యక్రమాలు నిర్వహిస్తారు. దీనిని 100 మజబూత్ స్టెప్స్‌గా ప్రధాని అభివర్ణించారు.

డ్రగ్స్ యువతను వారి కలల నుంచి దూరం చేస్తాయని, ఒక్క యువకుడి నష్టం ఆ కుటుంబాన్ని, సమాజాన్ని కుంగదీస్తుందని ప్రధాని అన్నారు. శత్రు దేశాలు కూడా డ్రగ్స్ సరఫరా చేసి దేశాన్ని నాశనం చేయాలని కుట్ర చేస్తున్నాయని హెచ్చరించారు. ప్రతి యువకుడు తన సామర్థ్యాన్ని కాపాడుకోవాలని, ఎవరైనా తప్పుగా ఈ వ్యసనానికి లోనైనా అది అంతం కాదని, పునరావాసం ద్వారా బయటపడవచ్చని ఆయన సూచించారు. కాలేజీ ప్రొఫెసర్లు డ్రగ్స్ ముప్పుపై విద్యార్థులతో చర్చించాలని, క్యాంపస్‌లలో నశా ముక్తి ఉద్యమం నడపాలని విజ్ఞప్తి చేశారు. నశా నుంచి బయటపడిన వారిని సమాజం సమ్మానించి మరో అవకాశం ఇవ్వాలని కోరారు.

డ్రగ్స్ వ్యాపారులు, స్మగ్లర్లపై కేంద్ర, రాష్ట్ర ప్రభుత్వాలు కఠిన చర్యలు తీసుకుంటున్నాయని ప్రధాని తెలిపారు. గతంతో పోలిస్తే అరెస్టులు బాగా పెరిగాయని, వేల కోట్ల విలువైన డ్రగ్స్ స్వాధీనం చేసుకున్నట్లు చెప్పారు. ఈ ఉద్యమం డ్రగ్స్ మాఫియాకు పెద్ద ఖౌఫ్‌గా మారుతుందని ఆశాభావం వ్యక్తం చేశారు. మొత్తం 100 వారాల పాటు వివిధ ఆధ్యాత్మిక, సామాజిక సంస్థలు వారం చొప్పున బాధ్యత తీసుకుంటే పెద్ద ఎత్తున మార్పు వస్తుందని అన్నారు.