మణిపూర్‌లో శాంతి కోసం ప్రధాని మోదీకి CWG సిల్వర్ మెడలిస్ట్ రిషికాంత సింగ్ విజ్ఞప్తి

కామన్వెల్త్ గేమ్స్ (CWG) రజత పతక విజేత రిషికాంత సింగ్ ప్రధాని నరేంద్ర మోదీని మణిపూర్ సందర్శించి శాంతిని పునరుద్ధరించాలని విజ్ఞప్తి చేశారు. భారత జట్టుతో కలిసి దేశానికి పతకాలు తెచ్చిన అనంతరం మీడియాతో మాట్లాడిన ఆయన, మణిపూర్‌లో గత మూడేళ్లుగా కొనసాగుతున్న హింసను గుర్తు చేస్తూ, ఒక్కసారి ప్రధాని రండని కోరారు. 'మణిపూర్ నుంచి వచ్చి ప్రపంచ వేదికపై పతకాలు సాధించాను. కానీ నా రాష్ట్రం అల్లాడిపోతోంది. ఒక్కసారి ప్రధాని మోదీ మణిపూర్‌కు వచ్చి శాంతి తీసుకురావాలి. ఈ వీడియో ప్రధాని దృష్టికి వెళ్తే చాలా సంతోషిస్తాను' అని రిషికాంత సింగ్ చెప్పారు. తన రాష్ట్రం క్రీడలకు నిలయమని, కానీ హింస కారణంగా ఎంతో మంది ప్రతిభావంతులైన ఆటగాళ్లు వెలుగుచూడలేక పోతున్నారని ఆయన ఆవేదన వ్యక్తం చేశారు. మణిపూర్‌లో శాంతి నెలకొంటే, ఇంకా ఎక్కువ మంది ఆటగాళ్లు దేశానికి పతకాలు సాధిస్తారని అన్నారు. దేశ ప్రజలు తనపట్ల చూపిన ప్రేమకు కృతజ్ఞతలు తెలియజేస్తూ, రాబోయే పోటీల్లో మరిన్ని పతకాలు సాధిస్తానని హామీ ఇచ్చారు. మణిపూర్‌లో 2023 మే నుంచి మైతీ, కుకీ వర్గాల మధ్య ఘర్షణలు చెలరేగి వందలాది మంది మరణించారు, లక్షలాది మంది నిరాశ్రయులయ్యారు. ప్రధాని మోదీ ఇప్పటి వరకు మణిపూర్ సందర్శించలేదని ప్రతిపక్షాలు విమర్శిస్తున్న నేపథ్యంలో, రిషికాంత సింగ్ విజ్ఞప్తి ప్రాధాన్యత సంతరించుకుంది. ప్రధాని కార్యాలయం నుంచి దీనిపై స్పందన రావాల్సి ఉంది.