యోగ ప్రపంచానికి భారత పరిచయ ద్వారం: ప్రశాంతి కుటీరం గోల్డెన్ జూబ్లీలో ప్రధాని మోదీ

యోగ ప్రపంచానికి భారత్ను తెలుసుకునే ప్రవేశ ద్వారంగా మారిందని ప్రధాని నరేంద్ర మోదీ అన్నారు. బెంగళూరులోని ప్రశాంతి కుటీరం (S-VYASA) గోల్డెన్ జూబ్లీ వేడుకల్లో ఆయన పాల్గొని ప్రసంగించారు. యోగాను ప్రజల జీవితంలో భాగం చేయాలని, దాని ద్వారా ఆరోగ్యవంతమైన సమాజాన్ని నిర్మించాలని ఆయన పిలుపునిచ్చారు.

ఈ సందర్భంగా ప్రధాని మోదీ ప్రశాంతి కుటీరానికి మార్గదర్శనం చేసిన శేషాద్రిని గుర్తు చేసుకున్నారు. తనకు నిరంతరం ఆయన స్నేహం, మార్గదర్శనం లభించాయని చెప్పారు. ఒక తల్లి స్వార్థం లేకుండా బిడ్డ కోసం రాత్రంతా మేల్కొని ఉంటుందని, అదే భావాన్ని సమాజానికి విస్తరించినట్లయితే దేశానికి పెద్ద లాభం జరుగుతుందని ఆయన అన్నారు. రెండు చేతులతో సమాజానికి ఇస్తే, సమాజం లక్షల చేతులతో తిరిగి ఇస్తుందని శేషాద్రి చెప్పేవారని ప్రధాని గుర్తు చేసుకున్నారు. డాక్టర్ నాగేంద్ర, డాక్టర్ నాగరత్న తమ కార్యక్రమాల ద్వారా ఆయన మిషన్‌ను ముందుకు తీసుకెళ్తున్నారని ప్రశంసించారు.

స్వామి వివేకానంద ప్రేరణతోనే ప్రశాంతి కుటీరం వంటి సంస్థలు ఏర్పడ్డాయని ప్రధాని అన్నారు. ఇక్కడ యోగాన్ని ప్రజల్లోకి తీసుకెళ్లడమే కాకుండా ఆధునిక విజ్ఞాన శాస్త్ర ప్రమాణాలపై పరిశోధనలు జరిగాయి. యోగ శిక్షకులు, ఫిలాసఫర్లు తయారయ్యారు. ఇక్కడి శిక్షకులు, వైద్యులు, పరిశోధకులు ఇప్పుడు ప్రపంచవ్యాప్తంగా సేవలు అందిస్తున్నారు. ప్రశాంతి కుటీరం నుంచి విస్తరించిన S-VYASA, యోగ విద్య, సైంటిఫిక్ రీసెర్చ్, హెల్త్ సర్వీసెస్‌లో కీలక సంస్థగా ఎదిగిందని, ఆయుర్వేదం, నేచురోపతి, మాడర్న్ మెడికల్ సైన్స్‌ను కలిపి హోలిస్టిక్ వెల్‌నెస్ ఎకోసిస్టమ్‌ను తయారు చేసిందని ప్రధాని తెలిపారు.

భారత చొరవతో ఇప్పుడు ప్రపంచవ్యాప్తంగా అంతర్జాతీయ యోగ దినోత్సవం జరుపుకుంటోంది. సౌదీ అరేబియా యోగాను క్రీడా కార్యకలాపంగా గుర్తించిందని, యోగా ప్రచారం కోసం ఆ దేశ క్రీడా మంత్రిత్వ శాఖ భారత AYUSH మంత్రిత్వ శాఖతో ఒప్పందం కుదుర్చుకుందని ఆయన చెప్పారు. ప్రపంచంలోని వివిధ దేశాల్లో 150కి పైగా ఆయుర్వేద శిక్షణ కోర్సులకు గుర్తింపు లభించింది. ఆయుర్వేద విస్తరణ కోసం 28 దేశాలతో ఒప్పందాలు కుదుర్చుకున్నారు.

దేశంలో యోగాసనానికి పోటీ క్రీడ హోదా ఇచ్చారని, Khelo India, National Games వంటి కార్యక్రమాల్లో యోగాసనానికి చోటు కల్పించారని ప్రధాని తెలిపారు. ఆయుష్ కోసం ప్రత్యేక మంత్రిత్వ శాఖను ఏర్పాటు చేశారు. విదేశీయులు చికిత్స కోసం భారత్‌కు రావడానికి వీలుగా e-AYUSH వీసా సౌకర్యాన్ని ప్రారంభించారు. జామ్‌నగర్‌లో WHO గ్లోబల్ ట్రెడిషనల్ మెడిసిన్ సెంటర్ ఏర్పాటు చేశారు. పసుపు ఉత్పత్తి, నాణ్యత, ఎగుమతులను పెంచేందుకు నేషనల్ టర్మెరిక్ బోర్డును ఏర్పాటు చేశారు.

గత 12-13 ఏళ్లలో సుమారు 50 కోట్ల మంది భారతీయులు తీవ్ర పేదరికం నుంచి బయటపడ్డారని ప్రపంచ బ్యాంకు తాజా నివేదిక పేర్కొందని ప్రధాని చెప్పారు. యోగ వల్ల రోగం నుంచి విముక్తి లభిస్తుందని, అది జీరో కాస్ట్ హెల్త్ చికిత్స అని ఆయన అన్నారు. ప్రశాంతి కుటీరం 75 ఏళ్లు పూర్తి చేసుకునే సమయానికి దేశం వికసిత భారత్‌గా తయారై ఉంటుందని ప్రధాని అన్నారు. ఇప్పటి నుంచే వచ్చే 25 ఏళ్ల రోడ్‌మ్యాప్‌ను సిద్ధం చేసి, ఆ లక్ష్యం వైపు పని చేయాలని సంస్థను కోరారు.