PM మోదీ సెషల్స్ పర్యటన: వాణిజ్య, వ్యాపార సంబంధాలు మరింత బలోపేతం కానున్నాయి

ప్రధాని నరేంద్ర మోదీ సెషల్స్ 50వ స్వాతంత్య్ర దినోత్సవ సందర్భంగా అక్కడ పర్యటించడం రెండు దేశాల మధ్య వాణిజ్య, వ్యాపార సంబంధాలను మరింత గట్టి చేసేందుకు దోహదం చేస్తుందని సెషల్స్ ఛాంబర్ ఆఫ్ కామర్స్ అండ్ ఇండస్ట్రీ (SCCI) సెక్రటరీ జనరల్ లూయానా పిళ్ళే అభిప్రాయపడ్డారు. సెషల్స్‌లో భారతీయ మూలాలున్న జనాభా గణనీయంగా ఉండటంతో రెండు దేశాల మధ్య సోదరభావం, కుటుంబ సంబంధాలు ఉన్నాయని ఆమె పేర్కొన్నారు. ఈ పర్యటన ద్వారా వాణిజ్యానికి మించి నైపుణ్యాభివృద్ధి, డిజిటల్ సేవలు, ఫార్మాస్యూటికల్స్, పునరుత్పాదక ఇంధనం, ఆక్వా కల్చర్ వంటి రంగాల్లో సహకారం పెరిగే అవకాశం ఉందని వివరించారు. ఇప్పటికే ఈ ఏడాది వ్యవసాయం, ఆరోగ్యం, వాణిజ్యం తదితర రంగాల్లో భారత్‌తో అవగాహనా ఒప్పందాలు కుదుర్చుకున్నట్లు, వీటిని మరింత బలోపేతం చేయాలనుకుంటున్నామని లూయానా తెలిపారు. సెషల్స్ చిన్న దీవుల దేశం కావడంతో దిగుమతులపై ఆధారపడుతుందని, అందువల్ల ద్వైపాక్షిక వాణిజ్యంలో ఉన్న ఖాళీలను గుర్తించి పూడ్చేందుకు ఈ పర్యటన దోహదం చేస్తుందని ఆమె అన్నారు. సెషల్స్‌లో రిటైల్, నిర్మాణ రంగాల్లో భారతీయ కంపెనీలు, నిపుణులైన కార్మికులు ఇప్పటికే పెట్టుబడులు పెట్టి ఎదుగుదలకు తోడ్పడుతున్నారని గుర్తు చేశారు. పర్యాటకం, డిజిటలైజేషన్ రంగాల్లో కూడా భారతీయ పెట్టుబడులకు విస్తృత అవకాశాలు ఉన్నాయని లూయానా వివరించారు. ఈ సందర్భంగా భారత ప్రభుత్వంతో కలిసి వ్యూహాత్మక ప్రాధాన్యతలను గుర్తించి సహకారాన్ని పెంచుకునే దిశగా అడుగులు వేస్తున్నామని, ప్రైవేటు రంగ ప్రతినిధులను కూడా ప్రతినిధి బృందంలో చేర్చడం ఒక పెద్ద ముందడుగని ఆమె పేర్కొన్నారు.