భారత్-ఆస్ట్రేలియా ఆర్థిక భాగస్వామ్యానికి కొత్త ‘రన్వే’: ప్రధాని మోదీ

ప్రధాని నరేంద్ర మోదీ భారత్-ఆస్ట్రేలియా వ్యాపార భాగస్వామ్యాన్ని కొత్త ‘రన్వే’గా అభివర్ణిస్తూ, పెట్టుబడులు, ఇన్నోవేషన్ కు విస్తృత అవకాశాలను ఆవిష్కరించారు. భారత్-ఆస్ట్రేలియా వ్యాపార సదస్సులో ప్రసంగించిన ఆయన, ప్రపంచ ఆర్థిక అనిశ్చితి, సప్లై చైన్ అంతరాయాల మధ్య ఇరు దేశాలు సహజమైన, విశ్వసనీయ భాగస్వాములుగా ముందుకు సాగాలని పిలుపునిచ్చారు. 2022 లో అమల్లోకి వచ్చిన ECTA ఒప్పందం తర్వాత భారత్ నుంచి ఆస్ట్రేలియాకు ఎగుమతులు రెట్టింపు అయ్యాయని, ఇప్పుడు సమగ్ర CECA ఒప్పందం దిశగా చర్చలు సాగుతున్నాయని ప్రధాని తెలిపారు. ఈ ఒప్పందాలతో ప్రభుత్వాలు కొత్త ‘రన్వే’ నిర్మించాయని, ఇకపై పెట్టుబడులు, ఆవిష్కరణల విమానం దానిపై దూసుకెళ్లాలని ఆయన అన్నారు. క్లీన్ ఎనర్జీ రంగంలో భారత్ 2030 నాటికి 500 GW పునరుత్పాదక విద్యుత్ సామర్థ్యం, 2070 నాటికి నెట్ జీరో లక్ష్యంగా పెట్టుకుందని, ఆస్ట్రేలియా సాంకేతికత, వనరులు ఈ మార్పుకు ఊతమివ్వగలవని చెప్పారు. అలాగే, అణు రంగాన్ని ప్రైవేట్ కంపెనీలకు తెరిచిన భారత్ 2047 నాటికి 100 GW అణు విద్యుత్తును లక్ష్యంగా చేసుకోగా, ఆస్ట్రేలియాలోని భారీ యురేనియం నిల్వలు ఈ ప్రయాణంలో చారిత్రక అవకాశాన్ని అందిస్తున్నాయని వివరించారు. మౌలిక వసతుల విస్తరణపై ప్రధాని మాట్లాడుతూ, భారతదేశంలో ప్రతిరోజూ 34 కిలోమీటర్ల జాతీయ రహదారులు, 8 కిలోమీటర్ల రైల్వే ట్రాక్ నిర్మాణం జరుగుతోందని, నౌకాశ్రయాలు, విమానాశ్రయాలు, పట్టణ మౌలిక వసతుల్లో దీర్ఘకాలిక పెట్టుబడులకు అవకాశం ఉందని చెప్పారు. ఉక్కు రంగంలో ఇప్పటికే బలమైన సహకారం ఉందని, గ్రీన్ స్టీల్, క్లీన్ మ్యానుఫ్యాక్చరింగ్ పై కలిసి పనిచేయాలని సూచించారు. డిజిటల్ రంగంలో ఏఐ, క్వాంటమ్, సెమీకండక్టర్ వంటి రంగాలకు ప్రభుత్వం బిలియన్ డాలర్ల మద్దతు ఇస్తోందని, ఆస్ట్రేలియా పెన్షన్ ఫండ్లు 4 ట్రిలియన్ డాలర్లకు పైగా ఆస్తులు నిర్వహిస్తున్నందున భారత్లో సురక్షిత, స్థిర వృద్ధికి పెట్టుబడి పెట్టవచ్చన్నారు. GIFT City లో డీకిన్, వుల్లాంగాంగ్ విశ్వవిద్యాలయాలు క్యాంపస్ ప్రారంభించడం ఆస్ట్రేలియా విశ్వాసానికి నిదర్శనమని, విద్యార్థి మార్పిడిని ప్రతిభా భాగస్వామ్యంగా మార్చాలన్నారు. రాష్ట్రాల మధ్య సహకారాన్ని పెంచుకోవాలని ప్రధాని ప్రతిపాదించారు. Western Australia కీలక ఖనిజాల బలాన్ని ఒడిశా, గుజరాత్ తయారీతో, Queensland, Tasmania ల క్లీన్ ఎనర్జీ, వ్యవసాయ నైపుణ్యాన్ని పంజాబ్, తమిళనాడు, ఆంధ్రప్రదేశ్ రెన్యూవబుల్ కారిడార్, ఫుడ్ ప్రాసెసింగ్ ఎకోసిస్టమ్ తో, New South Wales, Victoria ల ఫైనాన్స్, విద్య, వైద్య సాంకేతికతలను మహారాష్ట్ర, కర్ణాటక, తెలంగాణతో, South Australia రక్షణ, అంతరిక్ష సామర్థ్యాన్ని ఉత్తరప్రదేశ్, కేరళతో అనుసంధానించి ప్రపంచ పరిష్కారాలు రూపొందించవచ్చని సూచించారు. ఈ దిశగా రాష్ట్రానికి రాష్ట్రం, రంగానికి రంగం మధ్య భాగస్వామ్యాలను గుర్తించి వ్యూహాలు రూపొందించాలని కోరారు. ప్రజాస్వామ్య విలువలు, ఇండో-పసిఫిక్ దార్శనికతతో వ్యూహాత్మక అనుబంధం మరింత బలపడుతుందని, ఈ వ్యాపార భాగస్వామ్యాన్ని కొత్త శిఖరాలకు తీసుకెళ్లేందుకు అందరూ కట్టుబడి ఉండాలని ప్రధాని పిలుపునిచ్చారు.