మహబూబ్‌నగర్ జైలు నుంచి పోక్సో కేసు రిమాండ్ ఖైదీ పరారీ

మహబూబ్‌నగర్ జిల్లా జైలు నుంచి పోక్సో కేసు రిమాండ్ ఖైదీ ఒకరు పరారయ్యారు. 22 ఏళ్ల కిషోర్ కుమార్ రెడ్డి అనే యువకుడు ఉదయం 5:30 గంటల సమయంలో జైలు గోడను దాటి తప్పించుకున్నాడు.

25 రోజులుగా ఈ జైలులో రిమాండ్లో ఉన్న కిషోర్, బాత్రూమ్ వెనుక ఉన్న 18 అడుగుల గోడను ఎక్కి పారిపోయాడు. వనపర్తి జిల్లా, అమరచింత మండలం, నందిమల్ల గ్రామానికి చెందిన ఇతడు ఒక బాలికతో ప్రేమ వ్యవహారంలో పోక్సో కేసులో అరెస్టయ్యాడు.

తన ప్రియురాలు వనపర్తి జిల్లాలోని ‘సఖీ’ కేంద్రంలో ఉన్నందున ఆమెను కలవడానికే తప్పించుకున్నాడని పోలీసులు అనుమానిస్తున్నారు. డిఐజి ఎల్.ఎస్. చౌహాన్ సంఘటన స్థలాన్ని సందర్శించి వివరాలు సేకరించారు.

ప్రస్తుతం మూడు పోలీస్ స్టేషన్ల బృందాలు కిషోర్ కోసం గాలిస్తున్నాయి. సాయంత్రం వరకు పట్టుకుంటామని పోలీసులు తెలిపారు.