ఆసిఫాబాద్ జిల్లాలో పోడు భూముల వివాదం: అటవీ శాఖతో రైతుల ఘర్షణ, మహిళకు గాయాలు

కుమరం భీమ్ ఆసిఫాబాద్ జిల్లా కెరమెరి మండలంలోని సుర్జాపూర్ గ్రామంలో పోడు భూముల వివాదం తీవ్ర రూపం దాల్చింది. అటవీశాఖ అధికారులు భూములను స్వాధీనం చేసుకోవడాన్ని వ్యతిరేకిస్తూ రైతులు పెద్ద సంఖ్యలో అక్కడికి చేరుకున్నారు. ఇరు వర్గాల మధ్య ఘర్షణ చోటుచేసుకుంది. ఈ తోపులాటలో ఒక మహిళా రైతు చేతికి గాయాలయ్యాయి.

గత నెల రోజులుగా అటవీ శాఖ కందకాలు తవ్వడం, ట్రెంచీలు వేయడం వంటి చర్యలతో రైతులు పొలాల్లోకి వెళ్లకుండా అడ్డుకుంటున్నట్లు గ్రామస్థులు ఆరోపిస్తున్నారు. తాము 20–30 ఏళ్లుగా పోడు సాగు చేస్తున్నామని, ఇదే తమ కుటుంబాలకు జీవనాధారమని రైతులు చెబుతున్నారు. కొత్తగా భూమిని ఆక్రమించలేదని, అధికారులు తమను విత్తనాలు వేయనివ్వడం లేదని వారు ఆవేదన వ్యక్తం చేశారు.

ఘటన సమాచారం అందుకున్న స్థానిక ఎమ్మెల్యే కోవలక్ష్మి గ్రామానికి వెళ్లి రైతులకు మద్దతు తెలిపారు. అయితే, కాంగ్రెస్ ప్రభుత్వం అధికారంలోకి రాకముందు పోడు రైతులకు భూమి హక్కు పట్టాలు ఇస్తామని హామీ ఇచ్చిందని, రెండున్నరేళ్లు గడిచినా ఇప్పటి వరకు ఆ వాగ్దానం నెరవేరలేదని రైతులు అంటున్నారు.

పోడు భూములపై తెలంగాణలోని అటవీ ప్రాంతాల్లో దశాబ్దాలుగా వివాదాలు కొనసాగుతున్నాయి. గిరిజనేతర రైతులు కూడా పోడు సాగు చేస్తుండటం వల్ల ఈ సమస్య మరింత క్లిష్టంగా మారింది. రాష్ట్ర ప్రభుత్వం ఇటీవల పోడు భూముల క్రమబద్ధీకరణకు చర్యలు చేపట్టినా, నేటికీ రైతులకు పూర్తి భద్రత లభించలేదు. ఈ ఘటనపై అటవీ శాఖ అధికారుల స్పందన తెలియాల్సి ఉంది.