పాకిస్తాన్ ఆక్రమిత కాశ్మీర్లో నిరసనలు తీవ్రం; JAAC 48 గంటల గడువు, జూలై 9న భారీ ఉద్యమం

పాకిస్తాన్ ఆక్రమిత కాశ్మీర్ (PoK) లో ప్రజా వ్యతిరేక విధానాలకు వ్యతిరేకంగా నిరసనలు తీవ్రతరం అయ్యాయి. జాయింట్ అవామీ యాక్షన్ కమిటీ (JAAC) పాకిస్తాన్ ప్రభుత్వానికి 48 గంటల గడువు విధించింది. డిమాండ్లు నెరవేర్చకపోతే జూలై 9న ఫైనల్ యాక్షన్ కు దిగుతామని హెచ్చరించింది.

ముజాఫరాబాద్, రావలాకోట్, మీర్పూర్, దడ్యాల్, డెరాకోట్ తదితర ప్రాంతాల్లో వేలాది మంది రోడ్లపైకి వచ్చారు. ఆర్థిక దిగ్బంధనం ఎత్తివేయాలని, కమ్యూనికేషన్ సేవలను పునరుద్ధరించాలని, ఆహారం, మందుల సరఫరాకు ఆటంకం కలగకూడదని ప్రదర్శనకారులు డిమాండ్ చేశారు.

JAAC నేత షౌకత్ నవాజ్ మీర్ సహా 600 మందికి పైగా కార్యకర్తలు, రాజకీయ నాయకులను బేషరతుగా విడుదల చేయాలని నిరసనకారులు పట్టుబడుతున్నారు. అలాగే గతంలో ప్రభుత్వం అంగీకరించిన 38 అంశాల ఒప్పందాన్ని వెంటనే అమలు చేయాలని, మృతదేహాలు కుటుంబాలకు అప్పగించాలని కోరుతున్నారు.

జూలై 9 ఉద్యమంలో పాల్గొనాలని విదేశాల్లో ఉంటున్న కాశ్మీరీలకు JAAC పిలుపునిచ్చింది. పాక్ ప్రభుత్వ అణచివేతను స్వయంగా చూసేందుకు ఇస్లామిక్ సహకార సంస్థ (OIC), ఐరాస ప్రతినిధులు, అంతర్జాతీయ మీడియా, మానవ హక్కుల సంఘాలను PoK లో పర్యటించాలని ఆహ్వానించింది.

JAAC నేత సర్దార్ అమన్ ఖాన్ ఒక వీడియో సందేశంలో భారత్ సాయం కోరారు. ఆహార పదార్థాలు, నిత్యావసరాల సరఫరా నిలిచిపోయిన నేపథ్యంలో మానవతా సహాయం అందించాలని, పరిస్థితులు మరింత దిగజారితే నియంత్రణ రేఖ వెంట సరిహద్దు తెరవాలని విజ్ఞప్తి చేశారు.