పాము కాటుకు గురైన గిరిజన యువతి 15 కి.మీ. డోలీపై ఆస్పత్రికి

పోలవరం జిల్లా కూరవర మండలం కొత్త కారుమాను కొండ ప్రాంతంలో ఓ గిరిజన యువతి పాము కాటుకు గురైంది. నిన్న రాత్రి నిద్రిస్తున్న సమయంలో విషపూరిత పాము కాటేయడంతో, ఉదయం లేచిన ఆమె మత్తుగా ఉన్నట్లు కుటుంబ సభ్యులు గుర్తించారు. ఒంటిపై కాటు గాట్లు కనిపించడంతో వెంటనే ఆస్పత్రికి తరలించాలని నిర్ణయించారు.

ఆ ప్రాంతంలో రోడ్డు సౌకర్యం లేకపోవడంతో డోలీనే ప్రధాన రవాణా సాధనంగా ఉంది. కుటుంబ సభ్యులు యువతిని డోలీపై భుజాల మీద మోసుకుంటూ 15 కిలోమీటర్ల దూరం ప్రయాణించి, కూటూరు ప్రాథమిక ఆసుపత్రికి చేర్చారు. అక్కడ నర్సులు ప్రాథమిక చికిత్స అందించగా, డాక్టర్లు అందుబాటులో లేకపోవడంతో మెరుగైన వైద్యం కోసం చింతూరు ఏరియా ఆస్పత్రికి తరలించారు.

ఈ ఘటనపై స్పందించిన ఐటీడీఏ పీఓ శుభం నౌక్వాల్, బాధిత యువతికి సరైన వైద్యం అందించాలని వైద్యులను ఆదేశించారు. ప్రస్తుతం ఆమె ఆరోగ్యం నిలకడగా ఉన్నట్లు తెలుస్తోంది. గిరిజన ప్రాంతాల్లో ఇప్పటికీ డోలీపై ఆధారపడాల్సిన పరిస్థితిని ఈ సంఘటన మరోసారి చూపించింది.