మేడ్చల్ జిల్లా అల్వాల్‌లో చోరీ కేసు ఛేదించిన పోలీసులు.. వాచ్‌మేన్ అరెస్టు, ₹20 లక్షల బంగారం రికవరీ

మేడ్చల్ జిల్లా అల్వాల్ చంద్రపురి కాలనీలో శ్యామరావు కుటుంబం మూడు వారాల పాటు స్వగ్రామానికి వెళ్లి వచ్చింది. జూన్ 27న ఇంటికి తిరిగి వచ్చి చూడగా తాళం పగలగొట్టి ఉండడంతోపాటు బీరువా తెరిచి ఉంది. బంగారు ఆభరణాలు, వెండి వస్తువులు, నగదు చోరీకి గురైనట్లు గుర్తించి వెంటనే అల్వాల్ పోలీసులకు ఫిర్యాదు చేశారు.

కేసు నమోదు చేసిన ఇన్స్పెక్టర్ ప్రశాంత్ ఈ కేసు దర్యాప్తును డిటెక్టివ్ ఇన్స్పెక్టర్ వీరబాబుకు అప్పగించారు. పోలీసులు సీసీ కెమెరాల దృశ్యాలను విశ్లేషించి, ఇంటికి ఎదురుగా ఉన్న భవనంలో వాచ్మన్‌గా పనిచేస్తున్న లోహరాజ్‌పై అనుమానం వ్యక్తం చేశారు. విచారణలో అతను చోరీ చేసినట్లు అంగీకరించాడు.

పోలీసులు నిందితుడి నుంచి 13 తులాల బంగారు ఆభరణాలు (సుమారు ₹20 లక్షల విలువ), 330 గ్రాముల వెండి వస్తువులు స్వాధీనం చేసుకున్నారు. నిందితుడిని అరెస్ట్ చేసి రిమాండ్‌కు తరలించారు.