ప్రభాస్ 'ఫౌజీ' షూటింగ్ అప్‌డేట్: గచ్చిబౌలిలో చార్మినార్ సెట్, 90% షూటింగ్ పూర్తి

ప్రభాస్ నటిస్తున్న 'ఫౌజీ' సినిమా కోసం హైదరాబాద్‌లోని గచ్చిబౌలిలో భారీ చార్మినార్ సెట్ నిర్మించారు. హను రాఘవపొడి దర్శకత్వంలో తెరకెక్కుతున్న ఈ పీరియడ్ యాక్షన్ డ్రామాలో కీలక సన్నివేశాలు ఈ సెట్‌లో చిత్రీకరిస్తున్నారు.

గచ్చిబౌలి-లింగంపల్లి రోడ్డులోని ఓ అల్యూమినియం ఫ్యాక్టరీ ప్రాంగణంలో ఈ సెట్ ఏర్పాటు చేశారని సమాచారం. ఆగస్టు నుంచి 25 రోజుల షెడ్యూల్‌లో ప్రభాస్ పాల్గొంటున్నారు. ఈ షెడ్యూల్ ముగిసే సరికి సినిమా 90% షూటింగ్ పూర్తవుతుందని అంచనా.

అసలు చార్మినార్ వద్ద షూటింగ్ చేయకుండా ప్రత్యేక సెట్ ఎందుకు నిర్మించారంటే, ప్రభాస్ లాంటి ప్రముఖ నటుడితో అక్కడ చిత్రీకరణ జరిపితే వేలాది అభిమానులు గుమికూడే అవకాశం ఉంటుంది. ట్రాఫిక్, భద్రత, షూటింగ్ అంతరాయం వంటి ఇబ్బందులు తప్పించేందుకే సెట్ నిర్మించినట్లు తెలుస్తోంది.

కాగా, 'ఫౌజీ' సినిమాను ఈ ఏడాది డిసెంబర్ 3న విడుదల చేయాలని చిత్రబృందం లక్ష్యంగా పెట్టుకుంది. షూటింగ్ త్వరలోనే పూర్తయి, పోస్ట్ ప్రొడక్షన్ పనులు వేగంగా జరుగుతాయని ఫిల్మ్ యూనిట్ వర్గాలు తెలిపాయి.