ప్రకాశం జిల్లాలో ఎంపీటీసీ, జెడ్పీటీసీ పోలింగ్: కొన్ని కేంద్రాల్లో విద్యుత్ అంతరాయం

ప్రకాశం జిల్లాలో ఎంపీటీసీ, జెడ్పీటీసీ ఎన్నికల పోలింగ్ ఉదయం 7 గంటల నుంచి కొనసాగుతోంది. మార్కాపురం, ఎర్రగొండపాలెం, చీరాల, పరుచూరు, చీమకూర్తి మండలాల్లోని పలు పోలింగ్ కేంద్రాల్లో విద్యుత్ సరఫరా లేకపోయింది. దీంతో ఓటింగ్ ప్రారంభంలో ఇబ్బందులు ఎదురయ్యాయి.

సెల్ ఫోన్ లైట్లు, కొవ్వొత్తుల వెలుగులో పోలింగ్ సిబ్బంది ప్రక్రియను ప్రారంభించారు. అనంతరం జనరేటర్ల ద్వారా విద్యుత్ సరఫరా చేస్తూ పోలింగ్ కొనసాగిస్తున్నారు. తుఫాను ప్రభావంతో మార్కాపురం, చీరాల ప్రాంతాల్లో వర్షం కురుస్తున్నా ఓటర్లు ఓటు వేయడానికి వచ్చారు.

ప్రకాశం జిల్లాలో మొత్తం 27 జెడ్పీటీసీ స్థానాలు ఉన్నాయి. మర్రిపూడి, పొన్నలూరు స్థానాలు ఏకగ్రీవమయ్యాయి. మిగిలిన 25 స్థానాలకు పోలింగ్ జరుగుతోంది. అలాగే 371 ఎంపీటీసీ స్థానాలకు గాను 151 ఏకగ్రీవం కాగా, మిగిలిన 220 స్థానాలకు ఎన్నికలు జరుగుతున్నాయి.

కొత్తగా ఏర్పడిన మార్కాపురం జిల్లాలో తొలిసారిగా జిల్లా పరిషత్ ఎన్నికలు జరుగుతున్నాయి. ఇక్కడ 21 మండలాల్లో 21 జెడ్పీటీసీ స్థానాలు ఉండగా, ఆరు స్థానాలు ఏకగ్రీవమయ్యాయి. మిగిలిన 15 స్థానాలకు పోలింగ్ కొనసాగుతోంది. 274 ఎంపీటీసీ స్థానాలకు గాను 217 ఏకగ్రీవం కాగా, 57 స్థానాలకు ఎన్నికలు జరుగుతున్నాయి.

ప్రకాశం జిల్లాలో 714 పోలింగ్ లొకేషన్లలో మొత్తం 1260 కేంద్రాలు ఏర్పాటు చేశారు. వీటిలో 83 కేంద్రాలను అత్యంత సమస్యాత్మక ప్రాంతాలుగా, 149 కేంద్రాలను సమస్యాత్మక ప్రాంతాలుగా పోలీసులు గుర్తించారు. ఆ ప్రాంతాల్లో భారీ బందోబస్తు ఏర్పాటు చేశారు. ఓటర్ స్లిప్‌తో పాటు ఏదో ఒక ఐడీ కార్డు చూపించి ఓటు వేయాలని అధికారులు తెలిపారు. పోలింగ్ ప్రశాంతంగా కొనసాగుతోందని, సాయంత్రం 5 గంటల వరకు జరుగుతుందని అధికారులు పేర్కొన్నారు.