వర్షం కోసం కృష్ణా నది ఒడ్డున మొసలికి ప్రత్యేక పూజలు

జోగులాంబ గద్వాల్ జిల్లా బీచుపల్లిలోని కృష్ణానది ఘాట్ వద్ద ఓ పురోహితుడు మొసలికి పూజలు చేశారు. వర్షం కోసం ప్రత్యేకంగా ఈ పూజ నిర్వహించినట్టు ఆయన తెలిపారు.

శనివారం (9వ తేదీ) ఉదయం పూజలు చేస్తుండగా ఘాట్ దగ్గర ఒక మొసలి కనిపించింది. దీన్ని గమనించిన పూజారి అనిల్ శర్మ, మత్స్యకార యువకుల సాయంతో మొసలిని జాగ్రత్తగా ఒక గదిలో భద్రపరిచారు. తర్వాత స్థానిక ఎస్ఐ, అటవీశాఖ బీట్ ఆఫీసర్‌కు సమాచారం అందించారు.

అనంతరం అనిల్ శర్మ మొసలి వరుణదేవుడి అధిపతిగా భావించి, వర్షాలు రావాలని నారాయణ ఉపనిషత్ మంత్రాలు పఠిస్తూ 15 నిమిషాలపాటు పూజ నిర్వహించారు. ఈ సమయంలో మొసలి ఎటువంటి హాని చేయకుండా ప్రశాంతంగా ఉన్నట్టు ఆయన వివరించారు.

అటవీశాఖ అధికారులు సంఘటనా స్థలానికి చేరుకుని మొసలికి వైద్యపరీక్షలు నిర్వహించారు. మొసలి ఆరోగ్యంగా ఉందని నిర్ధారించిన తర్వాత, స్నానార్ధులకు ఇబ్బంది కలగకుండా దాదాపు అర కిలోమీటరు దూరంలో నదిలో దానిని వదిలేశారు. మొసలిని పట్టుకోవడం ప్రమాదకరమని అధికారులు హెచ్చరించినట్లు పూజారి తెలిపారు.

ఇక్కడి కృష్ణా నదిలో మొసళ్లు ఎక్కువగా ఉండటం గమనార్హం. అయితే 20 ఏళ్ల తన అనుభవంలో ఇలా ఒడ్డుకు వచ్చిన సంఘటన ఇదే తొలిసారని అనిల్ శర్మ చెప్పారు.